RADEX BCMS ta expande y bay St. Maarten pa reforsa e control di frontera

ORANJESTAD (AAN):  RADEX BCMS, e sistema di maneho di control di frontera desaroya door di compania local, Gamma IT Solutions,

a wordo selecciona door di e Gobierno di St. Maarten pa mehora nan medidanan di seguridad di frontera.

            E logro aki ta sigui despues di e implementacion exitoso di RADEX BCMS na Aruba y St. Lucia. Cu e exportacion di e software aki na mas pais, Aruba tin un producto di calidad cu ta wordo exporta na nivel internacional.

            E ceremonia oficial pa firma e acuerdo, cu ta marca e lansamento di RADEX BCMS na St. Maarten, a tuma luga diahuebs 28 december 2023, na e Sala di Departures di Princess Juliana International Airport. Minister di Husticia, Anna E. Richardson, hunto cu Frank Baks di Gamma IT Solutions a celebra e ocasion aki.

            Na e evento aki tabata presente Jocelyn Levenstone, Director di Inmigracion y Servicionan di Control di Frontera y Brian Mingo, CEO di Princess Juliana International Airport.

            RADEX BCMS ta un solucion completo cu ta uza e tecnologia di mas moderno pa captura y busca datonan biometrico. Su diseño modular ta inclui un variedad di opcionnan pa control di frontera, manera:

Integracion cu Inmigracion: E ta conecta facil cu tur plataforma online pa ED cards y carchinan di turismo.

Proceso rapido di biaheronan: Cu un tempo impresionante di 10 seconde pa procesa cada biahero, e ta sigura un experiencia lihe y conveniente den aeropuerto.

Compatibilidad cu listanan di buskeda nacional y internacional: E ta traha cu tur lista di buskeda nacional y internacional pa haci e maneho di frontera un mas sigur.

Sosten pa turismo: E sistema ta inclui un modulo cu ta analisa datonan di bishitantenan pa yuda autoridadnan di turismo pa planea, promove y implementa strategianan eficiente.

Reportenan: E sistema ta brinda un cantidad di opcionnan di reportenan detaya y completo.

            Frank Baks di Gamma IT Solutions ta comparti “Nos ekipo ta sumamente orguyoso di a ser selecciona pa e proyecto aki. Nos ta hopi gradecido na Ministerio di Husticia di St. Maarten y tur otro departamentonan y conseheronan cu a forma parti den e proceso di decision. Nos ta aprecia e confiansa poni den nos programa di RADEX BCMS. Nos ta sumamente contento cu nos ta exportando RADEX BCMS, cu ta un software local, pa mas paisnan den Caribe. Nos tin tur confiansa cu e lo wordo implementa den hopi mas pais”.