Score grandi di Tributo na 70 Aña di Musica Carnavalesco

ORANJESTAD (AAN): For di tur skina publico a yega Diabierna pa e evento grandi di gala den Renaissance Convention Center. 

Y sin duda alguno, e compania dinamico Setar NV a score masha grandi mes cu evento di ‘Tribute to 70 Years of Carnival Music’.

   E escenario cu efectonan audiovisual, cu musica perfecto cu su resonancia acustico ideal, a pone tur hende bay den trans ora di recorda e mihor Roadmarchnan cu a sa domina nos cayanan durante 70 aña di Carnaval, e fiesta cultural mas grandi cu Aruba ta celebra.

   Loke a haci e Tributo aki bira uno historico, ta e orquesta completo principal cu tabata riba escenario cu 13 musico tocando instrumento di blaas, y cu mas musico combina di Aruba y di exterior.  Y di berdad nan a produci musica di calidad riba escenario.

   Setar NV sa di e importancia cu Carnaval tin como parti esencial di Cultura di e isla, y e evento aki lo ta algo cu lo enfoca riba e recuerdonan grandi.  Y publico no a djis keda sinta, pasobra e ritmonan aki ta pone pianan lanta for di stul y join den e jump-in enorme aki.  Pabien grandi na e organisadornan, y na nos prominente musico local Carlos Bislip, cu a haci esaki te ainda e mihor cu Carnaval tabatin pa ofrece.