Parlamentario John Hart:
ORANJESTAD (AAN): Despues cu e ley di presupuesto 2026 a pasa su paso formal na CFT pa conseho, y Raad van Advies, e concepto a yega Parlamento di Aruba pa evalua, controla, haci pregunta y debati. Parlamentario Hart ta splica cu fraccion di AVP ta den pleno preparacion pa analiza y entrega pregunta den e tempo estableci pa tur fraccion durante comision central.
Segun e ‘Economic Outlook’ di Departamento di Asuntonan Economico, Comercio y Industria (DEZHI) di mei 2025, economia lo crece nominalmente cu 1.7% na 2026. Esaki ta igual na un producto interno bruto (GDP) di Afl. 7.429 miyon. Compara cu e “Economic Outlook” di December 2024, esaki ta representa un ahuste positivo di 1.3%, of di Afl. 46 miyon.
Parlamentario Hart a bisa cu di su parti, su enfoke lo ta mas riba e control di e maneho di husticia pa e aña parlamentario nobo aki.
E menasa digital cu paisnan rond di mundo ta confronta ta aumentando. Aruba tambe cada biaha ta bira mas vulnerabel pa atake digital manera ransomware, phishing, fraude di identidad y engaño digital. E vulnerabilidad di paisnan chikito ta haci cu ta urgente pa fortalece e aparato hudicial cu experto pa afronta e menasanan aki.
Parlamentario Hart ta kere cu ta imporante pa ekipa e cadena hudicial cu expertonan den e area cibernetico. Echo ta cu un reto grandi den e cadena hudicial na Aruba ta falta di personal specialisa. Hart a resalta cu ta fundamental cu fondonan ta aloca den presupuesto 2026 pa fortalece e capacidad di e sector di husticia. Den e presupuesto 2026 por tuma nota cu Ministerio di Husticia ta contempla un paso importante cu e institucion di un cybercrime-unit.
“Esaki ta un desaroyo sumamente importante, pasobra menasanan cibernetico ta real y por tin consecuencia grandi pa nos comunidad y nos economia,” Hart a splica. Pa trata cu cybersecurity y cibercrime, Aruba mester refuerso di profesionalnan cu un base forensico den IT, analista di data y experto pa reforsa e cadena hudicial”.
