Quota Club Aruba ta bezig cu presentacionnan na scolnan basico cu nan campaña 'Cuida Bo Oido'

*Esaki specialmente den temporada di carnaval

ORANJESTAD (AAN) —Gwndeline Van Trikt Rojer, Lider di e Proyecto “School Presentations” di e campaña 'Cuida Bo Oido', di Quota Club Aruba.

Esaki ta un campaña cu Quota Club Aruba tin specialmente durante e temporada di carnaval, pa por trece e concientizacion especialmente na e scolnan basico, vooral nan ta cuminza cu alumnonan di 6de klas, p’asina nan sa con pa cuida nan oido durante cu nan ta disfruta di nos dushi fiesta di Carnaval, Gwendeline a expresa.

Van Trikt a indica cu local y internacionalmente, esnan concerni ta bira mas conciente di manera cu nan ta cuminza midi dicibel, vooral pa e earphones, y ta bay pone un limite tambe pa e wordo transmiti pa e ekiponan cu nan ta uza.

El a agrega cu na Aruba tambe a cuminza reinforza y DVG ta riba esey awo, y si tin concientizacion, aunke e ta haya cu falta hopi ainda.

Gwendeline ta haya cu e parti cu falta ta continuacion riba e hecho cu Quota ta purba di concientiza e pueblo cu no ta djis ora di carnaval so, e ta pa semper. E ta pa henter e aña pa tur evento cu e personanan ta wordo expone na un sonido largo, sea fiesta, concierto, futbol, of otro deporte, etc. Pues, unda cu bo bay mester cuida e parti ey di oido.

El a agrega cu Quota lo kier tuma un grupo como pilot, pa cuminza midi nan, por ehemplo den 5de klas sigui midi nan dos aña pa wak si nan a perde algo di su audicion of no.

Quota ta haci su test tur aña, den e Siman di Kibra Silencio cu Quota tin pa comunidad bin test nan oido gratuitamente, pero no tin un control specificamente pa e hoben riba esey.