Despedida conmovedor di e hoben Ayden Lanoy

ORANJESTAD (AAN): Diabierna atardi, famia, amigo y conocirnan di e hoben Ayden C'Jay Lanoy a hib'e na su ultimo lugar di sosiego.

Por a mira un cantidad di hende para pafor di Ad Patres Funeral Home, pa asina haya e oportunidad pa expresa nan tristesa y condolencia na e famia. 

Na Santana di Sabana Basora, mama di Ayden a tuma un momento pa papia cu e hobennan, na unda el a bisa cu su curason ta kibra, pero el a suplica tur presente cu e kier husticia pa su yiu, pero no e kier violencia. Y e ta spera cu nunca mas un mama pasa den loke e ta pasando. Nan lo busca husticia, pero na un forma legal.

E famia tambe a pidi pa niun hende biba cu rabia contra polis, "paso bo no ta gana e hende n'ey". Durante Carnaval, nan kier pa tur hende disfruta trankilo, sin violencia. Si un hende ta sinti rabia contra polis, ta miho pa keda cas y evita problema.

Mama di Ayden a enfatisa, "no bay haci problema, paso lamentablemente Ayden no ta bin bek". El a termina bisando, "unico cos mi ta spera, ta cu mi yiu no a sufri".