Lo implementa plataforma pa maneho di data di meter den iniciativa di Smart Grid

NV Elmar a anuncia partnership cu Minsait Indra Group

ORANJESTAD (AAN): E compania NV Elmar a anuncia diabierna su partnership nobo cu Minsait Indra Group, pa implementa nan plataforma robusto di maneho di data di meter (MDM - Meter Data Management). Esaki ta demostra N.V. Elmar su compromiso y un gran paso padilanti den NV Elmar su iniciativa di Smart Grid y modernisacion di su operacion.

            Desde 2014, N.V. Elmar a inicia e proyecto di Smart Meter. Actualmente, 48,000 smart meter ta instala, restando solamente 2,000 smart meter pa instala ainda, cual ta proyecta pa finalisa den maart 2025.

            Den siguiente fase di e iniciativa di Smart Grid, lo maneha datonan tecnico cu e smart meter ta genera. Esaki ta sirbi como un conexion crucial entre smart meters y e business applications di Elmar, garantisando un seamless operation y data insights.

            Pa logra esaki, N.V. Elmar a busca un plataforma solido cu por sostene e iniciativa aki. Despues di evalua diferente proveedor, a selecciona Minsait cu a cumpli cu tur rekisito tecnico y operacional di N.V. Elmar, ademas di nan reputacion excelente. Minsait Indra Group, ta un di e leading technology companies cu ta atende cu desafionan relaciona cu transformacionnan digital den organisacion- y institutonan. Minsait ta sostene mas cu 500 miyon cliente cu un di nan solucionnan di meter, den colaboracion cu 500 companianan di utilidad den mas di 90 pais rond mundo.

            E partnership a wordo formalisa riba diabierna, 24 di januari 2025, cu N.V. Elmar representa pa sr. Alfred Croes y director Anthony Irausquin firmando e acuerdo mientras Minsait tabata representa pa sr. Rafael Márquez Pardi y sr. Marcelo Martino.

            E implementacion lo inicia na maart y termina prome cu fin di aña 2025. E partnership aki lo permiti N.V. Elmar pa maneha dato di meter mas efectivo, y alabes lo posiciona Elmar pa logra exito cu ta sostenibel y innovativo den e sector di energia cu ta cambia continuamente.