Pueblo a entrega MEP 9 di e 21 asientonan den Parlamento

Despues di un gobernacion di austeridad den crisis financiero y Covid-19 -  *Total voto pa oposicion ta solamente tres mas cu loke Wever-Croes a haya - *Democracia a papia un palabra cla na urna electoral den eleccion crucial

ORANJESTAD (AAN) — Democracia no a laga ningun luga na duda, kende e kier pa goberna e pais. E resultado di eleccion, tabata di acuerdo cu tur encuesta cu a wordo hiba na Aruba durante ultimo simannan.

E diferencia entre encuestanan por lo general y e resultado di eleccion tabata, cu den e encuestanan tabata tin semper un un porcentahe di poblacion cu no tabata sa pa kende e mester a vota, mientras cu durante eleccion un persona ta deposita su voto riba un partido a menos cu e kier vota blanco of haci su voto invalido.

Ora mira e cantidad di hende cu tabata tin derecho pa vota na 2021, por mira cu e cifra total a baha cu 467 compara cu 2017.

DIARIO a discuti e resultadonan di eleccion durante fin di siman cu expertonan, cu a mustra cu Pueblo a papia un palabra cla y sigur mas cla cu na 2017 ora por a mira con AVP a gana eleccion pa e cantidad di voto pero cu mes tanto asiento cu MEP.

Na 2021, MEP a perde 1.377 y AVP a perde 5.037 voto.

MEP a mantene su 9 asientonan di 2017 pero AVP a perde dos asiento.

Esaki ta haci cu e situacion cu ta surgi a base di eleccion 2021 ta diferente for di e situacion na 2019.

Ora Mike Eman na 2017 a nenga di forma Gobierno, e tarea a keda pa Evelyn Wever-Croes. Pues e nomber di e partido cu lo a forma e Gobierno a cambia, pero e cantidad di asiento basico pa forma un gobierno, a keda mescos ya cu ambos partido tabata tin 9 asiento.

Na 2021 ta surgi un situacion diferente.

MEP por presenta dos asiento mas cu AVP pa forma un Gobierno nobo. MEP por cera un acuerdo pa gobernacion cu un solo partido cu dos asiento y ya conta cu un mayoria di 11 asiento.

Pa AVP por haya un mayoria di 11 asiento, e mester di 4 asiento.

Si AVP y e otro partidonan dicidi pa forma un gobierno y laga MEP afo manera nan a haci na 1985 pa tene Betico Croes for di gobernacion, nan por forma un gobierno cu 12 asiento pero na momento cu un partido cu dos asiento hala atras, Gobierno ta cay.

Pues e posicion cu Pueblo a duna AVP pa forma un Gobierno ta mucho mas chikito cu e posicion cu MEP a haya pa forma un Gobierno mientras por mira claramente cu ni como partido di oposicion, AVP por a gana MEP.

Ora mira e resultado di eleccion, e boluntad di Pueblo ta bini dilanti.

E boluntad di mayoria di Pueblo ta claramente pa MEP forma Gobierno y MEP a haya e base pa por haci esaki, loke ta implica cu Pueblo kier pa MEP ehecuta e plannan di gobernacion, cu ta hancra den e Masterplan cu Gobierno di MEP a presenta na Pueblo na 2021.

Manera DIARIO a trece dilanti mester tene na consideracion cu MEP a goberna Pueblo den un tempo cu no tabata tin placa pa fiesta mas, cu mester a tuma medida di austeridad, ehecuta e plannan cu a acorda cu Hulanda pa habri caminda pa futuro.