Reino Hulandes a mustra con Evelyn a dicidi pa Aruba sin hamber pa poder y titulo - *Ni politica sushi por a stroba Pueblo dicidi cu Evelyn ta su Prome Ministro - *A base di su logronan Evelyn no a ni uza proyectonan grandi den porta di Aruba
ORANJESTAD (AAN) — Rond mundo e desaster cu Covid-19 a provoca, a baha lidernan mundial. Hopi a pensa cu esaki tambe lo tabata posibel na Aruba cu Evelyn Wever-Croes, cu a scapa Aruba for di e desaster financiero mas grandi cu Aruba a yega di conoce.
Reino Hulandes a mustra cu Aruba a bati bancarota na 2017, despues cu hende sin concenshi a kere cu pa semper nan por sigui abusa.
Na 2017 tur hende kier a keda riba lama y no trapa pia na Aruba, cu tabata zink na man di gobierno di Mike Eman cu a haya sosten di tur cu e a wordo beneficia dor di proyectonan, cu a kita pan for di boca di e Arubiano humilde.
Traicion a marca pauta den placa cu Mike Eman y su grupo a kita for di e Arubiano cu tabata traha cu sudor di su frenta pa entrega na un grupo di probechado cu naturalmente no por sigui existi sin abuso cu a wordo comete manera rapportnan ta conclui.
Kende a goza di e paranda di placa cu tram a produci? Kende a goza di e fiesta di tapijtnan di hierba cu ta bula riba Watty Vos Boulevard? Kende a goza di placa cu e pober Arubiano mester paga awe na proyectonan PPS, na interes y pago di e debe nacional cu Mike a produci pa Aruba?
Ora Evelyn Wever-Croes a presenta forma gobierno na 2017, Mike mester a desaparece hunto cu su gang.
Evelyn Wever-Croes, a duna prueba cu e ta un profesional capaz cu no mester sconde na tur skine pa mira con e ta haya un puesto politico pa e tin entrada.
Evelyn Wever-Croes a duna prueba pakico el a yega caminda el a yega den bida prome cu el a bira politico. Su historial profesional ta indica cu e no tabata tin mester di puesto politico pa haya loke e mes por a produci.
Esaki a haci cu Evelyn Wever-Croes por a pone un fin a abuso cu tabata pasa cu Aruba y manera Hulanda mes a trece dilanti, evita cu Aruba lo a bati bankroet of evita cu Reino lo a drenta y kita tur poder, cu Betico Croes, a logra pa duna e Arubiano dignidad.
Pa hende por lucha cu dignidad, nan mester conoce contenido di e palabra dignidad, cu no ta algo cu tur hende ta nace cune. E ta propio si di e Arubiano, cu a pasa den hamber den pasado pero a lucha cu hombresa, norma y balor pa crea un pais cu despues a bira paraiso pa henter mundo te awe.
Cayman na boca di rio a trata di desprestigia Evelyn Wever-Croes na tur forma pero asina a demostra tambe kico tin nan tras. Na un forma trankil Evelyn Wever-Croes a bay eleccion sin sikiera menciona cu e tin dos proyecto grandi na caminda pa Aruba y cu awor e ora di recuperacion di Aruba a bati na porta.
Na e forma di mas simpel y cu poco palabra Evelyn Wever-Croes a presenta dilanti di Pueblo despues di a tuma medida severo pa habri caminda pa futuro.
Pueblo a papia. E democracia, e libertad cu un dia e Arubiano a logra, a dicidi cu Evelyn Wever-Croes ta keda Prome Ministro. Esey ta decision cla di Aruba cu a aumenta e asientonan cu Evelyn Wever-Croes a logra den eleccion anterior.
Viboranan mester a bay warda nan veneno, desconoci pa e Arubiano cu ta lucha cu dignidad.
Ta e Arubiano cu a lucha pa creacion di e paraiso Aruba, a dicidi cu ta Evelyn Wever-Croes e kier pa dirigi e pais Aruba cu no ta propiedad di ningun hende!
