Benny Sevinger a vota den prizon y rapport Refineria di Aruba den man di Husticia - *Ainda no tin claridad riba e motibo cu material di DIP a wordo confisca - *Alan Howell y su partido lo despedi di Parlamento como sospechoso di Husticia
ORANJESTAD (AAN) — Eleccion 2021 lo pasa pa historia no solamente pa e hecho cu el a tuma luga den tempo di Pandemia Covid-19.
Eleccion pa un constelacion nobo den Parlamento a tuma luga den un situacion hamas conoci den historia di Aruba.
Pa prome bez un Miembro di Parlamento di Aruba a vota na urna electoral den prizon di Aruba y ta exigi pa Parlamento bay tuma un decision si mester cambia ley pa dicidi kico ta pasa den un caso manera di Benny Sevinger.
Pa prome bez den historia di Aruba, wega a wordo haci cu e hecho cu AVP a haya mayoria di voto di personanan cu ta detene na KIA. Tabata sumamente tristo pa scucha con publicamente e asunto a bira un chiste y tabata wordo comenta cu esaki por ta resultado di estadia di Benny Sevinger, te awe Miembro di Parlamento di Aruba pero tambe candidato riba lista di AVP pa bolbe drenta Parlamento.
Sinembargo no ta Benny Sevinger so ta e problema.
Alan Howell a keda e unico miembro di Partido POR den Parlamento di Aruba, aunke e ta wordo sospecha door di autoridad den un caso di ladronicia di placa di fondo di fraccion di POR den Parlamento.
E aspiracion di Howell pa bolbe Parlamento despues di eleccion, no a bira realidad na urna electoral y e lo despedi como Miembro di Parlamento di Aruba como sospechoso den e caso di placa cu a desaparece for di e fondo di e fraccion di POR, loke tabata tambe motibo directo pa Gobierno Wever-Croes a yega na su fin ya cu Prome Ministro Wever-Croes no por a sigui a base di sosten di Howell cu no kier a retira di Parlamento y pasa su asiento pa otro miembro di fraccion di POR.
Ora tuma nota di cobertura di eleccion di Aruba, ta bini dilanti cu ta hustamente e aspecto aki a haya hopi atencion na nivel internacional y sigur den Reino Hulandes.
Mientrastanto ainda den man di Husticia tin e rapport forensico riba Refineria di Aruba cu ta wordo studia actualmente dor di Ministerio Publico cu mester dicidi si e contenido di e rapport ta duna ocasion pa un investigacion penal.
Den e rapport aki varios nomber di personanan cu actualmente ta miembro di Parlamento pa AVP, ta wordo menciona.
Aruba a bay eleccionnan pa Parlamento cu un caso cu tambe tin hopi atencion pero ainda ta en espera di hopi contesta. Ta trata aki di e hecho cu algun dia pasa, autoridad a presenta na DIP y a podera di documentonan. No a bini dilanti te ainda, pakico esaki a tuma luga.
Den tur sector na Aruba mas y mas ta surgi e pensamento, cu mester cuminsa cu screening pa Miembronan di Parlamento tambe y cu mester introduci un codigo di honor cu ta haci posibel pa na momento cu un Miembro di Parlamento, representante di Pueblo di Aruba wordo reemplasa dor di su partido si e mester haya su mes den problema cu husticia.
