Publico a ricibi berdadero treat ora guitarista Chris Kross y cantante Susjaira Kerpens a subi escenario

DIARIO a keda sumamente impresiona

ORANJESTAD (AAN): Diadomingo anochi durante e anochi di instalacion di Kiara Arends como Miss Universe Aruba 2022 den Crystal Theatre na Renaissance Mall, publico presente a haya entretenimento den forma di un duo cu a pone tur hende sinta, enfoca, y admira e tono y cancion cu tabata wordo presenta na nan.

   Riba e guitara electrico a presenta e conocido Chris Kross, y na microfono como cantante tabatin e simpatica y elegante Susjaira Kerpens.

   Chris Kross ta un genio musical di 26 aña, kende for di su edad hoben a cuminza haya les di blokfluit y piano.  Cu 14 aña di edad despues di a bira agil cu e videogame di ‘Guitar Hero’, el a bay pa cuminza toca un guitara di berdad, y awor por mira con grandi el a bira.

   Crystal Theatre su sala a ofrece un acustico perfecto pa e sonido di fidelidad halto cu tabata sali for di su guitara, toca na un forma yen di maestria y demostrando asina pakico e ta un di e guitarista mas stima na Aruba.  Ademas, e ta un alumno gradua di e famoso Berklee College of Music, y su presentacion tabata ingenioso e anochi.

   Hunto cune tabatin e dama hoben Susjaira Kerpens kende a presenta riba escenario cu un bistir sumamente yamativo, cu un sonrisa constante riba su cara, y ora el a cuminza canta, e voz a bira un admiracion total pa publico, specialmente pa su tonada y dominio excelente riba e ondanan di sonido cu tabata plama den sala.

   E forma con Susjaira tabata canta, e pasion pa expresa e letranan tabata sinonimo di un cantante feliz y buscando perfeccion y treciendo resultado tambe pa e publico presente, cu na final di cada cancion tabata resona aplauso fuerte p’e.

   Su adaptacion na cancionnan popular di Aruba, incluyendo infusion di cierto momento pa subraya mas profundo den algun area di e letranan, a laga publico cu un sonrisa riba nan cara.

   Tabata comosifuera cu e duo di Chris Kross y Susjaira Kerpens riba escenario, tabata un match fenomenal pa duna un presentacion asina agradable pa sinta y scucha.   E tabata igual cu un world-class entertainment e anochi ey den Crystal Theatre.

   Despues DIARIO a bin haya sa, cu Chris y Susjaira tabata conoce otro for di tempo nan ta kleuter.  Bo ta mira cu cada uno tin pasion enorme pa nan musica, pa nan forma di transmiti esaki, y e synergia final ta e satisfaccion di trece bek pa mundo, e habilidad magico di produci bon musica, cu ta dunabo asina e sentimento cu humanidad toch ta riba bon caminda cu entretenimento inolvidable, danki na dos artista di caliber mundial cu Aruba ta dispone di dje.

   DIARIO ta gradici Star Promotion cu a trece Chris Kross y Susjaira Kerpens riba escenario pa asina pueblo a mira cu Aruba su artistanan tambe ta dunando nan granito di arena, pa asina e isla aki avanza pa añanan nos dilanti.  Pabien Chris!  Pabien Susjaira!