Lo bay haci denuncia na Polis
ORANJESTAD (AAN): Den DIARIO mes por a lesa con Diahuebs siman pasa Centro di Control di Cacho a anuncia cu nan lo ta extendiendo nan horario di servicio entrante 1 di augustus 2022 y lo ta habri parti atardi tambe.
Sinembargo algo lamentable y di condena a socede Diamars atardi, 2 di augustus 2022, un di e personanan cu ta maneha e Centro CCC a haya su mes enfrenta cu un homber, kende a dicidi na los un Pitbull riba dje.
Prome cu esaki a sosode, e homber a splica cu e lo kier pa Centro CCC pone su pitbull drumi. E homber a splica cu el a ataca un otro cacho y tambe su yiu.
E manehador di Centro CCC a splica cu esaki no ta posibel mirando cu ya a constata cu e cacho ta peligroso caba, CCC no ta esun cu ta spuit e cacho, e lo mester yama Veterinaire Dienst pa haci esaki. A bise cu si e djis lag’e na Centro CCC ta iresponsabel mirando cu tin mas cacho na e centro y tin chens cu e a situacion por bay for di man.
E ora laat ey di anochi, Veterinaire Dienst na e momento ey no ta disponibel pa atende cu e cacho tampoco na e ora cu e homber a presenta. A conseh’e mirando e gravedad di e situacion, pa bay na un veterinario priva pa paga pa pone su pitbull drumi of e tin cu trece e dia siguiente riba un horario unda Veterinaire Dienst lo por atende.
E homber no a acepta e contesta, e no kier a razona, y a resorta na cuminza lanza insulto baho y tuma e decision pa menaza mas extremo, door di laga e pitbull los riba e manehador, cu e meta pa e animal ataca e trahador di Centro CCC. El a haci esey tambe, keriendo cu lagando e los lo bira responsabilidad di CCC y no di dje como doño mas. Un acto contra ley, un acto inhumano! Poniendo e bida di e manehador den peliger y tambe e otro cachonan.
Riba media social, Centro di Control di Cacho a laga sa cu nan lo duna keho na warda di polis como cu nan tin nomber y number di auto di e homber iresponsable aki.
E Centro ta lamenta profundamente loke a sosode Diamars na CCC y ta sumamente desapunta riba e comportamento di e homber aki. Awor nan ta laga e sucedido aki den man di polis y ministerio publico.
Di parti CCC, nos kier enfatisa cu Centro di Control di Cacho no ta luga pa trece bo cacho brabo pa pone drumi. Nan ta evalua cachonan cu yega of worde laga na CCC y si tin doño, e lo firma ki ta e posibel resultado di laga e cacho na CCC. Un di miho resultado ta cu nos ta logra haya doño nobo pe of fundacion cu lo yuda y e ta worde adopta.
E otro ta cu e ta worde poni drumi pa motibo nan cu por ehempel, e ta peligroso, e ta sufriendo di un of otro enfermedad of no por haya doño pe. Problematica di cacho riba caya ta algo cu CCC ta maneha conhunto cu Dog Control Unit (unidad di BCI).
Como doño di cacho, responsabilidad ta keda cerca bo aunke bo dicidi di lage pa su cuenta riba caya. Cual ta contra Ley di Cacho.
Como doño, por yama Veterinaire Dienst pa nan bin cerca bo y pone bo mascota drumi si pa un of otro motibo no kier of por cuida di bo mascota mas. Esaki ta cai bou di e responsabilidad di e doño. Pa keho contra un cacho, por yama BCI unda nan lo pasa controla y evalua e situacion y tuma stap nan segun Ley di Cacho.
