Rino Hermans, Hefe di Bureau Rampenbestrijdig:
*no laga social media crea panico innecesario
ORANJESTAD (AAN) – Señor Rino Hermans, Hefe di Bureau Rampenbestrijding Aruba (BRA), a comenta cu cada Isla di Caribe Hulandes ta maneha nan sistema di tempo, diferente.
Na momento di bisa, por ehemplo, cu Aruba ta den codigo geel, e instancianan di gobierno cu mester bay responde nan ta saca nan draai boek pa e codigo geel.
“Pero pa e pueblo, bo bisa nan ‘nos ta den codigo geel’ nan no sa kico nan tin cu haci. Nos ta prefera di yama un rueda di prensa y splica nan e escenario aki y bisa nan kico nos ta expect pa nan haci”, Hermans a comenta.
El a splica cu tin un parti dividi den tras fase, pa e sistema di horcan den e area. BRA tin e fase di informacion, e fase di boletin y e fase di “watch & warning”.
Hermans a splica cu den e parti di informacion METEO tin cu sake afo, pasobra ainda e coordinacion no ta central na Rampen Bureau. “Si e bira boletin e ora ey automaticamente Rampen Bureau hunto cu Crisis Team y Minister Presidente, lo yama rueda di prensa, segun e planning, pa keda informa e pueblo con e desaroyo ta bayendo. Door cu esaki nos no a haya un ‘watch’ y door cu e tabata un ‘tropical wave’ Meteo tabata encarga pa keda informa 2'or di atardi y 8'or di anochi saca un boletin”, e Hefe di BRA a menciona.
El a agrega cu di otro banda, tin social media cu asina tanto informacion riba network cu cada ken lo a cuminza determina nan mesun accionnan, anto eynan e ta kere cu, Aruba mester bin cu un maneho con, cu frecuencia, mester informa e pueblo pa no laga social media crea un panico innecesariamente
“Nos a hacie cu Bonny, nos a bisa 39 milimeter di awa, a cay 38, awo nos a bisa cu ta bay cay 35 milimeter di awa y a cay 30.6 te cu 7.30 or di mainta”, Hermans a acentua.
BRA ta haciendo uso di e software, cu mundo a desaroya, pa duna e mihor prediccion; kiermen, tin hende cu ta duna su analisis a base di su conocemento y ta crea panico. BRA a haya yamadanan diabierna anochi, pero e tabata 240 km noord di Aruba y esaki no ta e prome. Den Rampen Bureau tin 63 sistema registra cu a pasa den mesun ruta y nos sa kico tabata e consecuencia. Cuater ora despues Aruba su trafico tabata move atrobe manera nada a pasa.
