Psicologo Johnny Boekhoudt tabata orado principal den e Seminario pa Hende homber  

A trata e tema: “Emocion y Maneho di Stress”

ORANJESTAD (AAN) – Señor Johnny Boekhoudt ta un Psicologo Forensic cu tin seis aña den servicio di Centro Orthopedagogico Aruba, unda e ta traha cu hobennan entre 12 cu 18 aña di edad, cu pa un of otro motibo no por biba cu nan mayornan na cas, sea pasobra nan tin problema di comportacion of debi cu e situacion na cas ta malo; pero mayoria di caso ta un combinacion di ambos.

   E psicologo Johnny Boekhoudt tabata tin e gran honor di tabata e orado principal den e Seminario pa Hende Homber, cu a tuma lugar siman pasa den Teatro na Gloria, den cual el a elabora tocante e tema di “Emocion y Maneho di Stress”.

El a papia tocante e tema aki, pasobra e ta haya cu hendenan homber no ta bon den reconoce nan emocion, papia over di dje, pero tampoco nan sa kico pa haci cu nan emocion ora e ta bira di mas.

“Mi enfoke di mas importante tabata e emocion-miedo. Pakico miedo? Pasobra miedo ta e emocion cu ta influencia nos mas pa haci cosnan bon of haci cosnan malo. Y na Aruba mi ta ripara cu e emocion ey ta un emocion cu nos no ta reconoce, pasobra nos mayornan no a lanta nos ta reconociendo e, y vooral nos, hombernan, a siña pone nos emocionnan-miedo, un banda. Eigenlijk, nos a siña di nos mayornan cu no ta ok pa bo sinti miedo, y kico nos ta haci? Cambia e miedo haci’e den rabia”, Boekhoudt a señala.

El a agrega cu rabia ta pone e persona haya problema den vecindario, den comunidad, etc. etc., “Anto lo mi kier pa nos hombernan Arubiano siña reconoce emocion-miedo hopi miho, pasobra asina nos por evita problema pa nos mes”,  concluyendo asina su ponencia.

Na momento cu el a conclui a surgi un pregunta di un presente, kico p’e ta un homber? “Pa mi un homber, ta un homber cu ta durf di ta su mes, den tur su facetanan. Un homber cu ta keda su mes, anto no matter ki pechi e tin bisti. Un homber cu unda mi wak’e, den cual rol cu e ta, ki pechi cu e tin bisti e ta gewoon, su mes, pasobra esey mi ta sinti cu nos falta na Aruba. Na Aruba nos tin hopi hende cu ta play ta un hende, ta play un rol; mi a siña den bida djis ta mi mes. Anto un homber pa mi ta un hende cu ta durf di ta su mes”, el a reitera.

El a wordo puntra kico ta defini un homber. “Kico ta defini un homber ta eigenlijk e palabra proteccion. Pasobra esey ta nos rol di mas importante; proteha e hendenan rond di nos y braza e rol ey cu comunidad ta duna nos; anto e hendenan cu mas mester di nos”. Finalmente, basa riba un comentario y pregunta di publico, el acentua cu no necesariamente un homber cu ta cana dilanti bisa kico e otro hendenan tin cu haci ta un lider. Un homber lider ta esun cu ta para banda di su, por ehemplo, trahadornan y bisa nan cu hunto nan ta bay asumi e reto cu nan tin nan dilanti.