Gobierno cu meta pa entrante augustus 2024 cuminsa cu alfabetisacion den Papiamento

Parlamentario Shailiny Tromp-Lee:

• Cuminsando na Klas 1 di scol basico 

ORANJESTAD (AAN): Recientemente, como Presidente di Comision Fiho di Enseñansa di Parlamento, parlamentario Shailiny Tromp-Lee a invita Minister di Enseñansa y Deporte sr. Endy Croes pa bin duna un update riba e implementacion di e maneho di idioma cu Gobierno a presenta na Parlamento.

   Hunto cu Departamento di Enseñansa Minister a brinda informacion concreto encuanto e proceso pa introduci alfabetisacion na Papiamento den tur klas 1 na Aruba entrante augustus 2024. Esaki ta nifica cu nos muchanan ta bay siña lesa y skirbi na Papiamento.

   Hulandes ta bay den un otro bachi y lo keda trata como un lenga stranhero. Sigur mi ta aplaudi e decision aki cu sigur lo beneficia nos muchanan. Alavez mi ta contento di mira cu a percura cu e maneho ta dirigi riba desaroyo di e abilidadnan di tur 4 idioma cu nos ta custumbra cu nan aki na Aruba. Otro aspecto interesante ta e echo cu a percura pa e plan ta tene cuenta cu nos mercado laboral, doorstroming den e siguiente nivel di enseñansa y e competencia basico cu cada ciudadano di nos pais mester tin.

   Minister Croes y Departamento di Enseñansa a informa Parlamento cu e leynan existente ya ta brinda e oportunidad pa introduci dicho alfabetisacion. Cu otro palabra no ta rekeri cambio di ley of un ley nobo. Alavez a keda enfatisa cu mirando e proceso cu a keda encamina pa yega na e Maneho Integral di Idioma caminda e veld di enseñansa (Plataforma) tabata envolucra desde un principio den e concretisacion di esaki, ta existi draagvlak pa cu implementacion di dicho plan.

   A informa Parlamento cu den october a reuni cu Inspectie, directivanan di scol y demas stakeholders pa sigui traha riba e planificacion pa haci e introducion aki entrante augustus 2024 posibel. A keda indica cu Departamento di Eseñansa lo sostene directivanan di scol y cabesantenan di scol den e planificacion di e implementacion.

   Desde e luna aki lo inicia cu e Trayecto di Preparacion y Profesionalisacion di nos maestronan pa nan ta cla pa ehecucion di e plan entrante augustus 2024. Ta trata di 6 workshops cu lo trata entre otro contenido, pedagogia y didactica den idioma Papiamento y Hulandes.

   Sigur ta na su lugar pa gradici y desea tur clase di exito na e team encarga cu e implementacion di e maneho aki y cu ta trahando masha duro mes pa su concretisacion. Siguiente reunion cu Minister den Comision Fiho di Enseñansa nos lo trata e diferente leynan cu minister ta trahando riba nan. Cu otro palabra dentro di poco un biaha mas Minister lo ta na Parlamento.