Proyecto 'Port City' mester wordo desaroya den sinergia pa no laga un parti di Oranjestad muri

Director di ATIA:

ORANJESTAD (AAN):  Herrick Henriquez, Director di Aruba Trade & Industry Association (ATIA), a duna di conoce cu nan tin un opinion pa loke ta e proyecto di Port City cu tin planea pa e waf na Aruba.

            El a bisa cu ATIA tabata presente na e presentacion cu tabatin y esaki tabata hopi bunita y interesante. Ta trata di un vision cu lo ta bon pa futuro di Aruba y sigur pa comercio. Lo mester tin pasenshi pa e vision aki wordo desaroya ya cu e ta bay wordo haci den tres fase.

            Segun Henriquez, e tempo di desaroyo ta specula cu lo ta entre 10 cu 15 aña. Eynan ta bay tin un 'linear park' tambe, ta bay tin mas area publico, entre otro.

            ATIA tin cu bay check con ta bay bin cu ne, e financiamento cu mester. Un proyecto grandi asina ta bay yuda Aruba y lo ta un 'stempel' pa Aruba ora e turista crusero yega Aruba, a subraya. E proyecto lo mester wordo desaroya na un bon manera y sostenibel.

            Henriquez a sigui bisa cu si APA y e team di desaroyador keda pusha riba dje lo haya e inversionistanan corecto. Ta spera mas participacion di desaroyadornan local pa purba tene e circulacion di placa na Aruba.

            Pa loke ta su opinion riba si Port City lo afecta e negoshinan na Oranjestad, el a bisa cu e por bay afecta meymey di Oranjestad, pero eynan tambe gobierno tin un vision pa haci Oranjestad mas un area culinario. E area di Port City lo ta enfoca mas riba tiendanan, condominium, boutique hotels, pa un poblacion mas afluente, a splica.

            E ta kere cu tin cu traha hunto riba e parti aki pasobra no por laga un area muri y desaroya otro.