Lema: “Esun cu no sa su derecho ta mescos cu no tin derecho”
ORANJESTAD (AAN) – Dr. Jayburtt Dijkhoff, Director di Fundacion SIKI Aruba, a anuncia un hecho hopi positivo pa e comunidad di Aruba.
Dijkhoff a duna di conoce cu durante luna di Mei, Juni y finalizando Dia 5 di Juli, lo tin un campaña pa promove e derechonan di pashent den tur nos centronan di bario.
“Esaki ta algo hopi grandi pasobra no tur hende sa nan derecho. E meta di e campaña aki ta pa promove e derechonan di pashent den nos comunidad. Di con? Pasobra tin e lema den e campaña aki cu ta: ‘Esun cu no sa su derecho, ta mescos cu no tin derecho’. Esaki ta un situacion nada positivo pa e pashent, pasobra si e no sa kico e tin derecho riba dje, e chens ta hopi grandi cu e no ta bay haci uso di su derecho tampoco. Esaki tambe ta conta pa e dunadornan di cuido cu hopi biaha no ta wordo informa den totalidad kico e derechonan di pashent ta encera”, dr. Jayburtt Dijkhoff a señala.
El a agrega cu pa e motibo aki Fundacion SIKI a drenta den un partnership cu Cede Aruba, pa yega mas cerca di e comunidad, y ofrece charla completamente gratis na nos comunidad.
E charlanan aki ta bay tuma lugar casi tur siman, na luna di Mei, Juni, finalizando dia 5 di Juli, riba Diaranzon anochi cada siman, di 7 or pa 9 or di anochi y nan ta bay ta charlanan completamente interactivo. Esey kiermen cu tur persona cu por tin pregunta y ta canando cana cu “con esaki ta?”, “Ki mi tin derecho riba dje”, “Mi tin derecho riba mi file medico?”, “Ki informacion mi por haya?”, “Informacion riba segundo opinion?”, pa menciona algun topico, tur esaki por wordo contesta, den e charlanan aki.
Dr. Dijkhoff a menciona e Siguiente centronan di Bario: Dia 3 di Mei, Centro di Bario Noord; 19 di Mei, Centro di Bario Brazil; 17 di Mei na Centro di Bario Dakota; 31 di Mei, Centro di Bario Playa Pabao; 14 di Juni, Centro di Bario Lago Heights, cu ta e unico centro di bario cu e charla lo wordo duna completamente na Ingles. 21 di Juni ta bay ta na Centro Famia na Piedra Plat; 25 di Juni, Centro di Bario Savaneta; y pa finaliza e campaña dia 5 di Juli na Centro di Bario San Martin, na Santa Cruz.
Den tur e charlanan lo trata casi mesun tema, pero solamente ta bay tin enfasis riba un slide den cada centro di bario. Den e siguiente edicion lo por lesa mas informacion tocante e campaña aki.
