Proyecto pa hiba Santo Blanco di Aruba pa pone permanentemente riba Luna

ORANJESTAD (AAN): Riba Diaranson, e conocido cientifico di Aruba, esta Dr. Edward Cheung a haci un bishita na Ministro di Husticia Rocco Tjon, pa pidi un permiso special pa un fabuloso proyecto na caminda.

   Dr. Cheung, como engineer trahando riba varios proyecto estrecho cu NASA na Merca, a bin cu un proyecto nobo pa e aña aki.  Esey ta cu lo bay pone algo di Aruba riba Luna.

   Y esaki lo bay ta un tiki di e santo blanco bunita di Aruba, lo wordo manda pa Luna.

   Den e reunion aki cu Ministro Tjon, a dune splicacion di e idea aki y cu e mester ricibi permiso pa saca un cantidad chikito di santo di Aruba, pa bay cune na Merca.

   Ta conoci cu na Aruba, bo no mag di kita cocolishi, ni santo for di beach.  E tiki santo aki lo bay keda permanentemente riba Luna.

   Ministro Tjon na su turno, a indica cu tabata un placer di por dialoga cu Dr. Edward Cheung, un figura prominente den comunidad, cu sigur a pone Aruba riba mapa internacional academico.

   Nan a combersa riba un proyecto cu sigur ta algo cu nos tur por ta orguyoso di dje. Durante e siguiente expedicion pa luna, a colecta santo blanco di Aruba su playanan pa esaki por forma parti di e obheto cu pa semper lo keda riba e superficie. Asina aki, nos por bisa, Aruba ta riba Luna.

   E deseo di Dr. Cheung, ta pa cada mucha y hoben na Aruba, sa cu e distancia entre nos isla, nos mundo y e espacio ta mas cortico cu nunca, danki na tecnologianan moderno, y e soño di un yiu di tera.

   Dr. Cheung kier inspira cada mucha y hoben, y mustranan cu si nan ta desea di sigui den su pasonan, e lo ta na NASA ta warda riba nan.

   E permiso pa saca santo blanco, a wordo firma tanto pa Ministro Rocco Tjon, como tambe Prome Ministro Evelyn Wever-Croes.

   Varios mision pa Luna: Manera ta conoci, NASA tambe ta un di e agencianan cu a mustra interes atrobe pa haci viahe espacial rumbo pa Luna.  Recien a bira conoci cu e.o. China tin pensa di manda un mision humano pa Luna.

   Mesun cos tambe a wordo anuncia door di India, cu den di tercer cuartal di e aña 2022 aki kier manda nan Chandrayaan-3 lander y rover pa Luna.

   Rusia tambe ta trahando riba nan mision yama ‘Luna 25’ pa regresa Luna despues di un ausencia di 46 aña.

   NASA a anuncia recien cu nan lo kier usa Starship di SpaceX pa nan siguiente mision pa Luna.