Increibel con mundo a baila cu morto pa drenta aña 2022 --- *Paisnan desaroya tabata tin e herment contra Covid-19 --- *Democracia ta bira factor mortal sin concenshi humano y moral
ORANJESTAD(AAN)—Na entrada di 2022, algo sumamente serio a pasa na mundo.
Nos ta nenga di solamente mira loke a pasa na Aruba pero ta tene na bista tur e casonan di Omicron cu rond mundo a aumenta na forma explosivo.
“Kico hende kier realmente?” ta bira e pregunta grandi ora tuma nota con hende a comporta pa saluda un 2022, cu mester drenta historia como parti di avance tecnologico, intelectual etc.
Como medio di comunicacion, nos mester a sigui tur desaroyo rond mundo na final di 2021 y entrada di 2022 y nos tabata prepara pa cifranan cu awe ta wordo registra como casonan nobo di Omigron.
E desaroyonan di ultimo simannan, ta pone e pandemia Covid-19 den un perspectiva nobo.
Loke hende a haci durante December 2021 y prome dia di 2022, ta duna motibo pa cuestiona inteligencia humano.
Realmente e pregunta mester wordo lansa kico progreso di hende tabata realmente si tene na consideracion cu mas bien un instincto peor cu primitivo a keda registra.
Pa realisa kico a pasa na mundo desaroya, mester mira e dolor na paisnan cu no tin placa ni otro facilidad pa defende nan mes contra e Coronavirus nobo.
Ora mira informacionnan di paisnan sin desaroyo, paisnan pober, cu ta bira victima di personanan cu ta importa e malesa na nan pais, e pregunta ta surgi kico a pasa u sano huicio, cu inteligencia, cu moral, cu concenshi na paisnan desaroya.
Cifranan di Omicron y durante henter e pandemia actual, ta mustra claramente cu ta hende ta e problema mas serio.
Hende cu ta abusa di e terminologia “democracia” pa pone bida di otro hende na peliger.
E director di hospital di Aruba, cu awe no tin sosten di miembronan integro di sector medico, ta prueba di un mentalidad cu ta causa pregunta serio riba moral di hende.
Ta moral ta dicidi riba e grado di convivencia na un pais. Moral cu ta haci cu nos no kier nada malo pa otro y ta evita cu otro ta bira victima di un enfermedad of hasta ta muri.
Ta berdad cu nos tur mester muri, pero no por ta si cu un suicidio publico ta wordo orkestra dor di personanan cu ta enfrenta morto y ta transporta morto, basta nan por sigui baila, sigui come, sigui bebe manera cifranan mundial a demostra.
Un hende inteligente ta haya mas miedo pa hende cu e tin pa un animal feroz. Con cu mira un leon of tiger no ta mata hende si su barica ta yen.
Esaki ta nifica cu ni den selva tin un comportacion cu por compara cu hende cu ta nenga di bisti un tapaboca. Hende cu ta bay fiesta, sabiendo cu e ta contagia cu un enfermedad mortal, hende cu ta nenga di evita morto di otro.
Kico a pasa cu nos mundo? Kico a pasa cu un mundo cu conoce veteranonan valiente cu a lucha pa evita cu hende inocente ta muri?
E cifranan registra di Covid-19 na entrada di 2022, ta un berguensa pa e ser humano pa e realidad inhumano cu a haci e cifranan posibel.
Cifranan, cu ta representa un cantidad di hende cu a cuida nan curpa, pero a bira victima di abusador, cu a pasa henter anochi den fiesta pa despues infecta un miembro di famia, un agente politicial, un trahador den cuido, un bendedor den un empresa, tur hende riba su caminda.
Historia lo no relata entrada di 2022 como un victoria di un virus pero como victoria di abuso di hende bobo, cu ta destrui mundo y asina destrui nan mes.
Un mundo cu ta grita cu nan tin derecho democratico, tras di cual nan ta sconde, pa Omicron por yuda mata hende inocente!
