Proyecto pa amplia cantidad di motor ta treciendo hopi alivio pa WEB Aruba NV

Alfredo Koolman, director di WEB Aruba NV:

*Pa cumpli cu e demanda grandi di energia cu tin den comunidad

*Hopi orguyoso di su team experto di WEB 

ORANJESTAD (AAN) – Alfredo Koolman, director di WEB Aruba NV, a duna di conoce den entrevista cu DIARIO, cu nan proyecto di amplia nan cantidad di motor, ta treciendo hopi alivio, pa e demanda grandi di energia cu tin den comunidad. Esaki ta un proyecto na corto, medio y largo plazo, cu nan ta ehecutando.

            Koolman a indica cu esaki WEB a plani'e den un ruta rapido, pa keda cla na tempo, pa motibo cu e aumento di calor ta parce cu na Aruba ta bin mas trempan cada bes.

            “Sinembargo mi coleganan a haci un tremendo trabao, door di haci nan durante e lunanan di Juni, Juli y Augustus tambe, p’asina keda cla na tempo di forma cu nos tin e cantidad disponible pa nos por cumpli cu e demanda di nos comunidad, un bez cu biento cay, anto cu nos tin un aumento enorme na Aruba, tanto a consecuencia di nos economia creciente, pero tambe di e temperaturanan mas halto”, Alfredo Koolman a bisa.

            El a agrega cu esaki ta un alivio enorme tambe pa nan personal, pasobra nan tambe door di e crecimento enorme a ser conoci cu mester a haci mantenimento rapido, y esey a causa un presion enorme riba e personal.

            “Nos tabata tin obligacion, naturalmente na prome lugar, pa cumpli cu e demanda di energia pa nos comunidad, pero tambe pa e bienestar di nos propio personal. Pues, nos ta hopi contento mes cu e proyecto aki cu den un tempo rapido a keda realiza, den cinco luna, di e concepto te su realizacion. Un bon ehemplo di traha conhuntamente, no solamente papia pero tambe tuma accion”, Koolman a remarca, mustrando tambe hopi orguyoso pa su team experto di WEB.

            “Mi ta hopi orguyoso no solamente di mi hendenan di WEB Aruba NV, pero tambe den e bon cooperacion cu Bredenoord y nos contratistanan y tur esnan cu a contribui na e proyecto aki, cu ta hopi, hopi, importante pa Aruba.

            “Tin pais cu ta buscando e tipo di alivio aki, y hopi biaha nan ta mucho laat, y nos tambe ta core e riesgo eynan sinembargo nos tin un team hopi profesional cu ta enfoca riba nan mision. E mision pa cumpli cu nos pais, cu nos comunidad”, Alfredo Koolman a señala.