Jayburtt Dijkhoff, director Fundacion SIKI:
*Gobierno por tuma ehemplo y motiva nos pueblo
ORANJESTAD (AAN) -- Siguiendo cu e entrevista cu DIARIO tabata tin cu Dr. Jayburtt Dijkhoff, director di Fundacion SIKI, tocante e rapport STEPS, unda e ta mustra e diferente puntonan di preocupacion tocante e condicion di salud publico na Aruba, e tin un pregunta kico por haci pa mehora e panorama cu rapport STEPS ta presenta den su rapport.
“Esey ta keda como parti di e investigacion y como parti di Fundacion SIKI tambe, y ta unda nos ta haci e pregunta: kico otro nos por haci como poblacion, pa mehora e situacion? Pasobra ningun gobierno por pretende pa haci esaki su so. E mester traha hunto cu stakeholders y bisa wak, esaki ta e problema, con nos por haci pa nos cuminza come menos vet, nos ta come kizas menos frecuente, tin mas conocemento kico pa come y kico no come, e orarionan di come, en fin tur lo necesario pasobra alimentacion ta e problema di mas grandi.
By the way, mi por bisa esey basa riba mi mes. Mi a perde como 15 kilo, door di estilo di bida pero tambe door di stress y e no ta cuestion di culpa hende. Mi no ta kere den esey, mi ta kere den crea un ambiente sano, saludable, cu ta bira un choice automatico cu nos ta biba saludable. Si nos ta mira Singapore, Japon, y tur pais cu tin un salud publico tremendo, tur ta haci mesun cos. E ta hinca hasta den e cultura, den structura, cu nos por biba na un manera saludable. Eynan ta e rol cu gobierno por stimula nos comunidad”, Jayburtt a señala.
