Abogado a confirma esaki
ORANJESTAD (AAN): Taxistanan a reuni un biaha mas riba Diabierna, pa asina dicidi kico ta e siguiente paso pa haci pa e impasse cu nan tin riba e decision “out-of-the-blue’ cu Ministro Ursell Arends a yega hisa y benta riba nan den mundo di transporte publico.
A bin cu MB cu ta cambia e forma con Taxistanan por traspasa permiso pa otronan, y tambe MB pa cambia cantidad di asiento di 5 pasahero pa awor bira 7 pasahero. Despues Ministro a blof cu e tin varios Taxista cu ta aproba e MB nobo aki.
Pero cual ta e “varios Taxistanan aki”? Pasobra den e reunion di Diabierna, por a mira cu tin un grupo di 300 pico Taxista cu no ta di acuerdo at all cu e MB aki. Y nan tur a busca Abogado mr. Desiree Croes pa representa nan. Pasobra nan no ta di acuerdo cu diripiente Ministro ta bin cu cambio drastico, sin cu a cumpli cu reglanan di decencia, di e.o. reuni prome cu tur stakeholders, etc. Den e cambionan aki, Ministro a djis “hisa benta”, sin ningun clase di dialogo, sin check prome cu su partner den Gobernacion, y a hasta ataca taxistanan. Awor e 300 pico taxi ta declarando oficialmente cu nan no ta di acuerdo cu cambio di maneho.
Taxistanan ta indica cu Ministro ta violando tur principio di bon gobernacion, pasobra tin un procedimento normal aki cu tin cana, y no djis yega purba bula cabez di e Taxistanan. Nan a keda sorprendi tambe cu e falta di respet enorme ultimo simannan den nan direccion.
Abogado mr. Croes a indica cu 300 pico Taxista ta contra e MB cu Ministro kier pusha bao nan nanishi. Siendo cu e ta algo cu tin di bay via di Parlamento, pasobra e ta un maneho cu no ta pasa riba ningun ley. Taxistanan no ta acepta e maneho, y nan kier laga esey ta cla y raspa. Si acaso Minister kier a cambia maneho, e tabatin mester a haci esey na un otro manera.
E solo hecho cu Ministro a haye ta cambia e Version 3 di e MB, unda el a haye ta haci asina hopi cambio riba e Version 1 di e MB, bo ta mira caba ta con hopi eror tabatin den Version 1 MB. Cu tur e extra splicacion hinca aden, ta manera pone un berguenza cu Ministro y su huristanan a saca e Version 1 di MB asina malo. No obstante esey, e ta keda insisti cu e Version 1 di e MB tin di keda riba mesa.
Pa Taxistanan, e MBnan aki no ta duna mucho claridad, pero si ta duna hopi disgusto. Pa colmo awor no sa ta cual MB nan tin di bay mantene nan mes na dje. Acaso ta MB cu ta Version 1, of e MB cu ta Version 2, of e MB cu ta Version 3. Di con haci asina tanto cambio? Pa colmo Taxistana nno ta compronde pakico Ministro Arends no ta elimina e MB di Version 1.
Posibel keho penal: Abogado a indica cu lo bay warda luna di September drenta, pa asina Taxistanan bay purba haci “overschrijving” di vergunning. Si acaso esaki no por, mesora nan lo bay cana caminda pa Corte di Husticia. Recien un experto a splica cu e maneho di Taxi aki tabata andando asina hopi decada caba, te cu el a bira un ‘gedogen beleid’, pues Huez tambe kizas lo mir’e asina.
Abogado mr. Croes a mustra cu e Taxistanan tambe ta pensando di entrega un Keho Penal contra Ministro Ursell Arends, y esaki debi na e atakenan baho cu nan a ricibi di dje, y Taxistanan aworaki ta wordo menaza, ta haya insulto riba caya, siendo cu esey hamas tabata asina. Tur esaki awor debi cu Ministro a lanta y haya bon pa ataca Taxistanan. Esaki ta algo cu ainda ta bao evaluacion.
