Proyecto AWE tin como meta crea oportunidadnan real pa hobennan drenta mercado laboral

Minister Wendrick Cicilia:

ORANJESTAD (AAN):  Bou di e lema “Siña AWE, lidera mañan”, iniciativa AWE ta enfoca riba empodera y brinda sosten na un grupo di aproximadamente 10 te 15 hoben entre 16 y 35 aña, pa medio di oportunidadnan educativo, desaroyo personal y preparacion profesional.

E proyecto tin como meta inverti directamente den futuro di e hobennan cu posiblemente no semper tin acceso na oportunidadnan cu por yuda nan crece personalmente y profesionalmente. Su vision ta pa crea un ambiente di apoyo, caminda participantenan por descubri nan talento, fortalece nan autoestima, desaroya habilidadnan practico y prepara nan mes pa un futuro laboral mas sigur y exitoso.

E prome grupo lo participa na workshopnan di barberia, cu lo tuma luga dia 7, 14, 21 y 28 di september. Durante e sesionnan, e participantenan lo haya conocemento practico, experiencia “hands-on” y guia pa explora opcionnan di empleo of pa eventualmente cuminsa nan propio negoshi.

Alcides Marin, propietario di STASH, a enfatisa cu mester mira barberia como un profesion cu ta exigi dedicacion, disciplina y responsabilidad. “Barberia ta un trabou serio y no djis un hobby,” Marin a expresa.

Den su fase inicial, proyecto AWE lo ofrece cinco tipo di workshop profesional den areanan cu ta den demanda riba mercado laboral:

• Barberia
• Bartender y preparacion di bebida
• Atencion y servicio na cliente
• Tecnicanan di huña acrilico
• Aplicacion di lashes

Ademas, e proyecto lo brinda acceso na workshopnan di desaroyo personal y profesional, entrenamento vocacional, lesnan certifica, sosten educativo y oportunidadnan relaciona cu scol. Tambe lo brinda sesionnan di emprendemento y educacion financiero, mentoria, coaching personal, guia pa profesion y planificacion di futuro.

Ataniro a haci un yamada na comunidad y tur instancia envolvi pa brasa proyecto AWE y contribui na crea mas oportunidad pa nos hobennan. “Brasa e proyecto aki. No tur porta cu ta cera, ta cera na yabi. Tin biaha bo mester pusha un tiki p’e habri,” Ataniro a expresa.

Minister Wendrick Cicilia, di su banda, a enfatisa cu nos hobennan tin balor, no obstante e obstaculonan cu nan por a enfrenta den bida. Segun e mandatario, no por warda pa hobennan bin busca oportunidad. Mester bay directamente den bario, busca e hobennan, identifica nan talento, tende nan necesidad y conecta nan cu oportunidadnan real.

“Nos hobennan tin balor, no obstante e obstaculonan cu nan tabatin den bida. Nos mester bay den bario, busca nan y conecta nan cu oportunidadnan cu por yuda nan crece personal y profesionalmente,” Minister Cicilia a expresa.

E obhetivo di AWE no ta solamente educa, sino tambe crea oportunidadnan real pa participantenan drenta mercado laboral, cuminsa nan propio negoshi of continua cu nan estudio. Pa medio di e iniciativa, e hobennan lo haya habilidadnan practico, motivacion, confiansa y guia cu por tin un impacto positivo y duradero riba nan futuro.

Minister Cicilia a reafirma cu inverti den hobennan ta un di e miho maneranan pa fortalece comunidad. Door di brinda nan e hermentnan, conocemento y oportunidadnan cu nan mester, Aruba por contribui na forma lidernan futuro cu ta responsabel, motiva, independiente y prepara pa enfrenta e retonan di mañan.