Reflexion:
Pa Mercedes Monge
Dia 1 di Juni di e aña aki, mi a cumpli 34 aña di eherce periodismo, specificamente, den Matutino DIARIO.
Purbando di recore mi trayectoria, consultando cu mi memoria un rato, un pregunta mi consenshi a dicta mi: “Den e curso di e 34 añanan aki kico mi a siña y kico mi mes a aporta?”
Pa prome, mi a siña cu ora bo tin un vocacion di servicio, aptitud, actitud, y boluntad, no tin sumpiña riba caminda, ni obstaculo cu por stop bo di cana, tin biaha contra coriente, y bringa cualkier temor cu por stroba bo.
Riba e caminda aki, mi a siña e idioma cu mi ta stima. Mi a estrena un idioma cu a fascina mi aunke no tabata asina facil, pero cu esfuerzo y amor, mi a haya e habilidad; claro, no sin ayudo, mi a ricibi hopi ayudo pa mi yega te unda mi ta, awendia, cu nos dushi Papiamento, cu maske cu ainda mi no ta domine perfecto, el a adheri na mi “como la hiedra”. E ta mi idioma di trabao (mi pan di cada dia), mi idioma di cas y di mi ambito social, hunto cu mi lenga natal: Spaño.
Durante mas di dos decada y mey (prome cu cancer a bishita mi curpa) mi tabata hopi activo den nos mundo di prensa, no obstante sin auto. Unda cu mester a bay mi a yega tuma nota den conferencia di prensa, haci entrevista, saca potret unda mester, scucha, graba informacion, pa despues transcribi’e pa nos lectornan lesa, comenta y forma nan mes opinion. Esaki ta parti awendia di e legado historico, profundo di DIARIO, y di mi aprendizahe personal, loke mi a pasa pa e generacionnan cu a lanta tiki prome y durante e trayecto aki di mi 34 añanan den DIARIO. Mi logro di mas aprecia ta ora hunto cu un grupo di alumno di La Salle College, encabeza pa Siomara Everon, DIARIO a pone nos hubentud central cu e Seccion Hubentud den Movecion, y cu te ainda ta circula den un version chikito.
Ta parti di loke ta keda plama den nos archivonan legendario y nobo, cu diferente biaha tin lectornan ta bin busca, manera den un baul di historia, cu a acumula hopi escenario di e bida di nos pais. Eyden, entre tur e redactornan, esnan cu no ta cu nos mas, y esnan cu tey, mi tambe ta, y esey ta duna mi satisfaccion. Kere cu esaki ta un “ofishi facil” ta leu di e realidad. Traha noticia ta e alimento base di un corant, unda cu e berdad mester wordo honra, cu hopi responsabilidad, veracidad, respet y empathy, acercando fuentenan lo mas fidedigno posible, pa transmiti concientemente un informacion den cual nos mes y nos pueblo lector por confia plenamente, y tur esaki tambe mi a siña y aporta.
Mi ta conclui yamando danki na tur esnan cu durante e 34 añanan aki, a acepta mi, y duna mi e gran privilegio di forma parti di nos prestigioso Matutino DIARIO. Danki te na cielo na nos inolvidable Jossy Mansur (dfm), na señora Nuhad y Jossito y mi actual coleganan. Dios bendiciona boso tur.
