Biblioteca Nacional Aruba ta alcansa un momento historico cu aprobacion di su ‘formatierapport’ y ‘landsbesluit’

ORANJESTAD (AAN): Biblioteca Nacional Aruba (BNA) a alcansa un momento historico den su desaroyo institucional.

Despues di 77 aña di existencia, 40 aña funcionando como Biblioteca Nacional y 18 aña di deliberacion, BNA oficialmente tin su formatierapport y landsbesluit firma.

            Directora di Biblioteca Nacional Aruba, Sra. Astrid Britten, a anuncia e noticia na personal di biblioteca y a presenta e documento oficial, despues di un bishita di minister Croes na Departamento Arubiana-Caribiana + Digital Collections ubica na Bachstraat 5 y na e edificio central di biblioteca na George Madurostraat. E landsbesluit a wordo firma pa Gobernador di Aruba, Sr. Alfonso Boekhoudt y pa minister encarga di Biblioteca Nacional Aruba, Sra. Gerlien Croes.

            E logro aki ta representa un paso importante den e proceso di fortalecemento y formalizacion di Biblioteca Nacional Aruba como institucion. Tambe ta reconoce e funcion esencial cu BNA ta cumpli den comunidad como centro di informacion, educacion, cultura, lectura y preservacion di patrimonio nacional.

            Durante mas di siete decada, biblioteca a sigui evoluciona pa responde na necesidadnan di comunidad. Banda di brinda acceso na buki y informacion, BNA ta conserva y haci accesibel material relaciona cu historia y identidad di Aruba, ta promove lectura y conocemento, y ta ofrece espacio pa encuentro, investigacion, intercambio cultural y desaroyo personal.

            Realizacion di e formatierapport y landsbesluit ta resultado di un proceso extenso di consulta, deliberacion y colaboracion. Directie di BNA conhuntamente cu Departamento di Recurso Humano (DRH) a traha riba e trayectorio importante aki.

Biblioteca Nacional Aruba ta expresa su gratitud na Departamento di Recurso Humano y na tur stakeholder y profesional cu, durante añanan, a contribui cu dedicacion y perseverancia pa haci e resultado aki posibel.

            Pa direccion y personal di BNA, e momento aki no solamente ta celebracion di un logro institucional, sino tambe un paso significativo den construccion di un futuro mas fuerte y sostenibel pa Biblioteca Nacional Aruba.