Minister Endy Croes: a presenta proyecto na Parlamento
ORANJESTAD (AAN): Recientemente, comision fiho di enseñansa di Parlamento di Aruba a invita Minister di Enseñansa Endy Croes hunto cu e team di profesional di Departamento di Enseñansa Aruba (DEA) pa duna un splicacion di e maneho di idioma nobo.
Manera ta conoci, durante e luna di februari di aña 2023 a duna un presentacion caba di maneho di idioma na Parlamento di Aruba. Di acuerdo e deadline di Landspakket y recomendacion 2 di Doorlichting Rapport a tuma un decision riba e maneho di idioma dia 31 di maart 2023.
E comision di DEA a traha duro riba e rapport preliminar y plan di implementacion y a duna un presentacion amplio di esaki na Parlamento di Aruba.
Minister Endy Croes hunto cu directora di DEA Sra. Anne Marie Proveyer, Sr. Eduard Pietersz, Sra. Vanessa Pietersz y Sra. Gina de Kort cu ta esnan trahando riba e proyecto aki, a splica cu 12 di october a presenta na henter e veld di enseñansa e producto di implementacion di alfabetisacion na Papiamento pa maneho di idioma cu lo introduci na augustus di aña 2024 na e prome aña di scol basico di Aruba.
Locual tambe ta importante ta e parti di profesionalisacion pa e maestronan, pues mester prepara e maestronan di aña uno (1) di scol basico pa tin un bon maneho alfabetisacion na Papiamento pa nan por duna e lesnan aki.
Pa esaki tin un programa cu ta consisti d seis (6) sesion, unda e cabesante hunto cu e maestronan di aña uno (1) di scol basico lo mester asisti pa prepara nan mes. Banda di esaki, riba e website www.ea.aw tin un programa digital Matrix, unda cu e maestronan por sigui profesionalisa nan mes den e tema aki y otro temanan.
Durante e presentacion, Minister Endy Croes y e profesionalnan presente a contesta diferente pregunta.
Parlamento di Aruba den su totalidad ta sostene e idea pa e alumnonan haya les den Papiamento na inicio di scol basico.
Den rapport di UNESCO y World Bank ta señala e importancia pa e alumnonan haya les den nan idioma materno. Pues, Minister Endy Croes hunto cu e comision ta canando e trayecto y haciendo tur inventarisacion pa realisa e proyecto aki otro aña augustus.
