Minister Geoffrey Wever
ORANJESTAD (AAN): Regularmente ta realisa controlnan multi-disciplinario den supermercadonan. Esaki ta un colaboracion special entre Departamento di Asuntonan Economico, Comercio E industria (DEACI), Directie Volksgezondheid Aruba (DVG) y Korps Politie Aruba (KPA), cu e meta principal pa segura cu e consumidor ta protehi.
E control multi-disciplinario mester sirbi como un advertencia pa tur comerciante cu tin un supermercado, cu esaki mester ser manteni na un standard di limpiesa y higiena, na banda di otro factornan cu mester tene cuenta cu nan, manera permisonan necesario, y prijs di productonan den ‘Canasta Basico’ cu mester ta na ordo.
Ta importante cu nos ciudadanonan ta informa cu DEACI ta eherce control di prijs di productonan di e ‘Canasta Basico’ tur dia, y den tur districto”, segun minister Geoffrey Wever. “E control multi-disciplinario aki ta añadi na e esfuersonan diario, caminda DEACI conhuntamente cu DVG y KPA ta eherce control riba otro aspectonan di e negoshi manera e.o limpiesa y higiena, fecha di vencemento di producto, permisonan di negoshi y/of alcohol etc.
Minister Geoffrey Wever ta gradici e ekipo multifunccional entre DEACI, DVG y KPA. Den e temporada binidero lo sigui ehecuta controlnan. Cu prijsnan di comestibles cual a conoce subida den e ultimo añanan debi na inflacion, ta importante pa keda proteha esnan mas vulnerabel.
Tambe ta drentando temporada druk di fin di aña caminda hopi hende ta frecuenta supermercadonan pa nan necesidadnan. “Cu cooperacion entre DEACI, DVG y KPA lo sigui haci e controlnan regular aki pa prijs, higiena, y permisonan vigente”, minister Wever ta termina.
{gallery}Controlnan multi-disciplinario di higiena, prijs y permiso di supermercadonan ta continua{/gallery}
