Protesta riba camera a pone Aduana Aeropuerto tene walkout

Security Camera poni riba espacio sensitivo di Douanero- y Pasaheronan

• Douaneronan kier sa kende ta vigilando imagen di cameranan aki
• Ni dirigente di Aduana y ni Aeropuerto kier ta transparente 

ORANJESTAD (AAN): Incertidumbre rond di algun Security Video Camera cu a wordo instala na Aeropuerto di Aruba, a pone cu Diabierna mainta diferente funcionario di Aduana Aruba a sali pafo, y a core pidi presencia di nan representante di Sindicato SADA pa bay check kico ta pasando.

   Edward Maduro, kende ta president di Sindicato SADA a yega pa asina haya detaye nobo di su miembronan riba loke ta pasando.

   A sali na cla, cu desde luna di Juni 2025 caba, tecniconan a instala diferente Security Camera den espacio di Aduana!  Camera a wordo poni cu bista riba e “Visitatie Ruimte”, unda Douaneronan ta controla maletanan.  Ora cu e trahadornan di Aduane a cuminza puntra nan hefenan, ta kende a laga pone e cameranan, y lo mas importante, ta “kendenan” ta esnan cu ta vigila y graba loke e cameranan aki ta capta... no por a haya contesta.

   Na prome lugar, ningun hende sa ta kende a pone e cameranan aki cu ta manera spiona e trabao di Aduana.  Segun Maduro, awor a bin haya sa cu e cameranan aki ta pertenece na AAA NV, cu ta maneha Aeropuerto.

   Camera instala riba Visitatie-Ruimte: “Esey ta pone nos di Aduana tiki preocupa, pasobra ora bo ta pone camera den “visitatie ruimte” (y e cameranan aki no ta wordo atendi door di Aduana), e ora bo no sa kendenan ta vigilando e imagennan, e ora ta cuestiona ta cu ki intencion otro hendenan por mira e cameranan aki,” president Maduro di SADA a indica.

   “Nos en principio no tin obhecion pa pone camera, pasobra pa nos e ta seguridad di nos trahador mes.  Den pasado caba SADA mes a yega di boga pa pone camera eynan, pasobra a socede den pasado cu pasaheronan ta haci denuncia falso contra Douanero, kendenan ta keda 2 aña na cas, y na final ta haya razon toch.  Pasobra no tin grabacion di camera,” Maduro a splica.

   Pesey Aduana a pidi semper pa pone camera pa seguridad di tanto Douanero y pasahero, pero cu ta wordo maneha pa Aduana.  Den pasado ora cu a instala camera den oficina di Hefe di Warda di Aduana algun aña atras.  Pero esey a socede den tur transparencia y den tur participacion di e werkvloer, e.o. nan hunto a dicidi unda e camera tin di wordo poni, hasta tabatin acceso na e imagennan.  Pues el a wordo haci den forma transparente.

   Awor nada transparente: Pero awor na Juni 2025 a instala camera na forma scondi, bao capa di secrecia, ningun hende sa di nada, y esey ta mustra e desconexion cu tin entre Top di Aduana y e werkvrloer cu no ta transparente, nan no ta splica, ta bisa nada.  Trahadornan ta puntrando, pero ta haya un reaccion comosifuera cu nan no tin derecho di puntra, y esey ta preocupando henter e Sindicato.

   Tin di corda cu cada funcionario di Aduana ta huramenta, y pa ley nan tin e autoridad di controla den maleta di pasahero.  Pasobra el a huramenta cu e ta mantene e ‘privacy’ di e pasahero.

   Pero awo tin cameranan dirigi linea recta riba e maletanan, pues aworaki un pasahero no sa kende ta mirando e imagennan, y Douaneronan no sa cu ki intencion e ta wordo haci tampoco.  Pesey nan ta hopi preocupante y si resulta cu e cameranan aki ta wordo vigila door di tercera persona, sea ta AAA NV of otro compania cu no ta di e organizacion di Aduana, e ora nan di Aduana ta desaproba esaki totalmente.

   Si acaso ta camera bao vigilancia di Aduana, mas cu claro Sindicato ta di acuerdo cu esey pasobra semper nan a boga pa esaki.

   Atrobe tin di señala cu e dirigentenan actual di Aduana ta uno cu no tin ningun tipo di interes di e Douanero cu ta traha, y no kier ta transparente.

   E bin compronde cu e proyecto di camera aki ta uno cu ta andando pa 2 aña caba, y a compronde cu ora a purba di haya splicacion kende a ordena e instalacionnan aki, e Director no ta dunando un contesta claro si acaso e mes a duna autorizacion of no.  Un sin fin di tira piedra y sconde man.  Pero Sindicato lo bay investiga pa haya sa kende a duna ordo pa pone, y kendenan ta manehando e cameranan aki.

   Edward Maduro di SADA a indica cu si acaso no haya contesta satisfactorio di Dirigentenan di Aduana, e ora nan lo bay acerca Ministro.  Si esey no logra, nan lo acerca AAA NV tambe e ora.  Y den pasado a yega di socede cu SADA a sinta na mesa cu AAA NV riba varios asunto.

   Merdia a resumi trabao: Despues di mainta, e Douaneronan na Aeropuerto a resumi trabao bek.  Mainta no tabatin hopi movimento durante di nan walkout, y Hefe na turno a keda atende pasaheronan cu tabata yegando.

   Pues e walkout no a stroba e fluho di pasaheronan cu tabata yegando Aruba riba Diabierna mainta.  Sinembargo Edward Maduro a indica cu no ta descarta cu si acaso nan no haya ningun oido of reaccion, cu chens ta grandi cu e personal por dicidi pa intensifica e accionnan na Airport.

   Nan sa cu nan Director ta den exterior, y no sa si e Director interino kier bay tuma e caso aki pa atende.  Pero tin di atende e asunto di camera aki rapido, pasobra aworaki e ta crea un sorto di panico y ta demotiva e Douanero di labora den tur su trankilidad.