Representantenan politico di Aruba tin un tarea sagrado na 2025
*Aruba mester introduci Accion di Ministerio Publico Hulandes
*Exposicion di prueba di peligro pa derecho basico di ciudadano
ORANJESTAD (AAN) — Na caminda pa 2025, DIARIO durante ultimo añanan a bati alarma pa desaroyonan grandi cu na 2025 mester a culmina.
Prome cu pandemia ya na 2019 DIARIO a presenta articulonan relaciona cu entrada pa e “Era di Inteligencia Artificial”.
Na momento cu na 2020 Covid-19 a ataca mundo, e parti positivo di e desaroyo di comunicacion basa riba metodonan nobo, a keda presenta pero e resultadonan negativo a desaparece den desaroyonan cu mundo a neglicia.
Actualmente por bisa cu Inteligencia Artificial a alcansa un punto cu casi e ta domina asuntonan cu no por bay perdi den e realidad di comunidadnan democratico den cual e respet y derechonan di e ser humano ta hancra den sistema legal di e pais.
Na Hulanda algo sumamente importante a tuma lugar y ta urgi Parlamento di Aruba pa actua y ariba termino mas cortico posibel bini cu e proteccion cu democracia ta exigi pa bida priva di e ser humano.
Informacionnan cu a mira luz durante e siman cu a termina, ta indica cu Ministerio Publico Hulandes a kita tur coneccion entre su sistemanan interno y internet despues cu e Centro Nacional di Seguridad pa Asuntonan Cybernetico, a descubri cu ta existi elementonan cu ta permiti abuso di e sistema actual.
Despues di a analisa e situacion, Ministerio Publico di Hulanda a yega na conclusion cu e oportunidadnan di mal uso cu e sistema di internet ta inclui, en berdad por a worde practica.
E sistema ta bay exigi hopi trabou nobo pa henter e sistema hudicial pero ta coresponde na e derecho di e ser humano pa no bira victima di e sistemanan nobo di comunicacion, cu diariamente ta presenta mas peliger pa bida personal di ciudadanonan.
E decision Hulandes ta bati un alarma na Aruba tambe. Un alarma cu den pasado na diferente ocasion DIARIO a trece dilanti den cual e bida priva di hende, cu ta base directo pa su felicidad, ta wordo pone na peligro.
Mientras ta keda na hende pa den comunicacion personal moderno presenta su propio historianan, e momento a yega pa Parlamento di Aruba, atende directamente cu tur ley cu ta rekeri entrega di informacion personal di hende y e garantia di proteccion cu e ser humano tin a base di leynan cu ta sostene democracia real!
Den esaki mester bolbe na leynan basico di nos pais, cu actualmente ta na wega pasobra sistemanan nobo ta stroba e garantia di derechonan di un ciudadano pa proteha su informacionnan personal.
Ya den pasado DIARIO a mustra ariba exigencianan nobo pa hende suministra informacionnan personal online, pues pa medio di computer na instancianan cu mester ricibi informacionnan personal di hende.
Mas y mas por nota con e contacto personal pa regla asuntonan priva, ta wordo kibra dor di exigencianan pa entrega hasta copia di documentonan oficial pa atende asuntonan pa medio di internet.
Con por duna garantia cu den un mundo caminda valornan a bay perdi y hende no ta respeta ni su mes, e reglanan pa atende cu informacion personal, no ta bay perdi?
Ministerio Publico di Hulanda ta mustra riba e necesidad pa haya alternativa pa e facilidad cu internet ta brinda pa comunica pero tambe ta bira oportunidad di abuso di informacion sumamente importante pa e ser humano.
Na e momentonan aki mas cu nunca, Parlamento di Aruba mester acomoda nan mes na e realidad actual y di futuro cu un progreso rapido di ciencia a presenta.
E prome paso cu mester tuma ta, revisa tur ley ariba stipulacionnan cu ta mishi cu e integridad directo di e ciudadano.
Mester bolbe den ley pa deshaci di areglonan y permisonan cu te awor ta existi, pa hasta den persecucion di crimen, informacion por cay den man robez pa motibo di abuso cu internet ta permiti.
E avance di mundo moderno, ta exigi adaptacion di loke ta yama su mes mundo politico, cu teniendo su mes na valornan nacional di pais, ta bandona e ambiente di “mente chikito” pa habri wowo pa realidadnan importante cu ta afecta na cualkier forma e base democratico di un pais.
Cu urgencia mester pone fin na tur peligro cu comunicacion via internet ta forma pa e derecho di privacidad personal di e ciudadano, cu no por wordo atende cu sistemanan moderno den cual obligatoriamente e ciudadano ta entrega y ta perde su derecho pa su informacionnan personal wordo respeta y pa medida wordo tuma contra tur loke pone e bida priva di hende na peligro!
