Proteccion di Shoco ta esencial pa nos mes y nos cultura

Greg Peterson, Presidente di Aruba Birdlife Conservation:

ORANJESTAD (AAN)-- Señor Greg Peterson, Presidente di Aruba Birdlife Conservation, a menciona den entrevista cu Matutino DIARIO, cu si Aruba no ta cuida su shoconan, Aruba Birdlife ta perde cara y hopi turista ta mira esaki. Personalmente e ta bisa cu e shoco ta di pueblo di Aruba, di nos mesun hendenan, y si nos lag'e bay, nos ta falta respet di nos mes.

“Bo no ta sirbi como ciudadano si bo ta laga un especie gewoon bay perdi, y si nos kier haci algo bon pa Aruba, nos tin cu cuida nos pais. Y esaki ta conservacion”, Greg Peterson a señala.

Bao conservacion di Aruba su fauna, logicamente e ta considera aden tur animalnan cu e Isla tin, y den esaki el a contesta un pregunta di DIARIO, tocante e Ley di Cacho, cu no tin control riba su cumplimento.  Yen di cacho y pushi ambulante por mira hasta riba beach y tur caminda di Aruba. Pues, si no por controla e ley di cacho, con ta bay controla e cuido di shoconan?

“Nos tin nos manera. Na 2012 tambe, nos a haya nos shoco regula, cu ta den Parlamento awo. Pues, nos si a bay dilanti. Na 2012 nos a bin cu mas cu 20 tereno cu a bira parti di Parke (PNA), dus nos si ta move, y mi ta kere cu nos ta mas serio y mas dedica. E parti di cacho no tin ‘someplace’ y no tin weso di lomba den e proceso aki, anto nos tin veterinarionan cu a duna hopi conseho den pasado pero hopi hende no ta pone atencion na esaki. E cachonan cu ta los riba caya tambe tin problema cu shoco, prikichi (ta destrui nan) y nos tin cu cambia henter nos actitud, nos mentalidad”, señor Greg Peterson ta indica.