Ministro Dowers a reuni cu Ministerio di Husticia di Corsou

Minister cu agenda yen durante su bishita:

ORANJESTAD (AAN): Minister di Husticia, Integracion, Transporte Publico y Energia, mr. drs. Arthur Dowers, tin un agenda yen durante su bishita na Corsou, den cual e mandatario a tene diferente reunion y bishita cu autoridadnan y representantenan den e area di husticia.

   Despues di su reunion cu Gobernador di Corsou mr. Mauritsz de Kort, Minister Dowers a continua su agenda cu un bishita na e Presidente nobo recien huramenta di e Gemeenschappelijk Hof van Justitie, mr. Carmelia.

   Durante e encuentro a dialoga riba diferente aspecto relaciona cu e administracion di husticia y e importancia di mantene un contacto cercano y cooperacion entre Aruba y Corsou.

   Minister Dowers a continua su programa cu un bishita na Ministerio di Husticia di Corsou, unda señora Luz-Celeste Johannes, Beleidsdirecteur di Ministerio di Husticia di Corsou a ricibi e mandatario di husticia di Aruba.

   Despues di un encuentro breve cu parti di e team di e Ministerio, Minister Dowers a ricibi un presentacion amplio tocante e Ministerio di Husticia di Corsou, su structura organizacional y e diferente trabao cu e Ministerio ta ehecuta.

   E presentacion a zorg pa un bon interaccion entre Minister Dowers y e team di Ministerio di Husticia, unda tanto Minister Dowers como e team a intercambia idea y experiencia riba diferente aspecto relaciona cu e trabao di e Ministerionan di Husticia di ambos pais.

   E bishita na Ministerio di Husticia Corsou ta brinda tambe un oportunidad pa conoce mas di cerca e manera con e Ministerio di Corsou ta funciona, su diferente departamentonan y e trabaonan cu nan ta eherce den e area di husticia.

   E diferente reunionnan y bishitanan cu Minister Dowers a tene durante su estadia na Corsou ta forma parti di su agenda den cuadro di e Justitieel Vierlandenoverleg, unda e ta representa Aruba hunto cu su coleganan di Corsou, Sint Maarten y Hulanda.

   Cu e diferente encuentronan aki, Aruba ta sigui mantene un contacto directo cu e diferente autoridadnan y instancianan den e area di husticia, cu e meta di intercambia experencia y sigui fortalece e cooperacion entre e paisnan den Reino.