Proposicion nobo di ley ta bay bira un logro grandi pa Taxista y chauffeur di Autobus na Aruba

ORANJESTAD (AAN): E siman aki, DIARIO a tuma nota cu un proyecto di ley a ser entrega door di Parlamentario Ady Thijsen y sosteni pa Rocco Tjon. 

A ser mustra cu e proyecto di ley aki ta na beneficio di Taxista como chauffeurnan di Autobus na Aruba

   E proposicion di ley aki ta contene e siguiente cambionan:

1. a) Na momento cu afkeuring tuma lugar pa motibo di malesa, bista cu a bay atras of keda invalido pa motibo di accidente etc. ta haya e derecho pa apunta un hulpchauffeur, pa tempo indefini, apesar cu e houder envolvi no a yega e edad di 65 ainda.
2. b) Na momento cu un vergunninghouder tin mas cu 65 aña e taxista y e chauffeur di autobus por retira y bay descansa y e por haya un hulpchauffeur pa tempo indefini pa asina sigura cu e lo por tin un entrada adicional fuera di su A.O.V. Asina e tambe lo por biba un bida digno y tin un entrada cu e lo por biba comodo y no depende di un AOV solamente.
3. c) Na momento cu un Taxista of chauffeur di Autobus ta incapacita pa cumpli cu su profesion temporalmente, e ta autorisa pa apunta un hulpchauffeur, sin tin mester aprobacion di minister of instancia, despues di a ser declara temporalmente malo.
4. d) Na momento di vakantie (maximal 45 dia pa aña), e Taxista of chauffeur di Autobus ta autoriza pa apunta un hulpchauffeur, sin tin mester aprobacion di minister.
5. e) Na momento cu un Taxista of chauffeur di Autobus no ta desea di haci uzo mas di su permiso, e por pasa esaki riba nomber di un familiar.
6. f) Na momento cu un Taxista of chauffeur di Autobus fayece su herederonan ta autorisa pa pasa e permiso na un heredero den caso cu no tin un hulpchauffeur. Si e esun cu a fayece tabata tin un hulpchauffeur na momento cu el a fayece, esaki lo bin na remarca prome.

   Un proyecto di ley, cu beneficio pa taxista y chauffeur di autobus, a ser entrega oficialmente 16 di juni 2021 y awor e ta bay pa conseho na Raad van Advies como parti di e proceso pa bira ley.

   Observadornan ta haya cu esaki sigur ta un gran logro y ta na su lugar pa duna Sr. Ady Thijsen como e gran promotor di e proposicion aki y Rocco Tjon e felicitacion pa esaki.

   Esaki ta e prome biaha cu un propuesta di e enbergadura aki, pa tanto e taxista y e chauffeur di autobus, ta tuma luga den cuadro di cu e ser humano ta central cu den realidad mester conta pa tur hende y esaki ta inclui esnan den transporte publico tambe.