Hospital ta contra bahamento di gasto den cuido y pesey a bin cu alternativanan

ORANJESTAD (AAN): Presidente di Raad van Bestuur di Hospital Jacco Vroegop Diahuebs mainta a papia tambe riba e rapport cu un comision special

a traha riba e estado di salud na Aruba, mirando tambe e bahamento di gasto di 5 miyon florin pa luna cu a wordo exigi algun tempo atras.

El a bisa cu ta importante pa bisa cu despues di e crisis di Covid-19, awor Aruba ta cayendo den un crisis di salud.

“Esaki ta e motibo tambe pakico hunto cu tur partido den sector di cuido nos a bay sinta y den e crisis aki nos a haya otro”.

Nos ta papiando riba kico nos por haci hunto pa sali for di e crisis y keda afo di esaki.

Nos ta contra tanto bahamento di gasto den cuido, aunque tin biaha nos por compronde cu bahamento di gasto por ta necesario, cu hunto nos tin cu traha mihor y mas eficiente, cu e produccion mester aumenta y cu nos tin cu wak nos salarionan tambe, segun Vroegop.

El a sigui bisa cu na mes momento si baha mucho gasto, no por brinda e calidad di cuido cu kier wordo duna.

Esaki ta nifica cu e calidad por bay atras.

“Ta algo cu nos no por haci nos so”.

Nos tin cu discuti esaki hunto y e rapport ta pa mustra cu baha gasto sin mas lo afecta e calidad di cuido.

Nos a bin cu alternativanan pa 10 aña pa mustra kico ta necesario pa mantene cuido saludable, pa por trata tur hende, pa salvaguardia calidad y pa percura pa dentro di 10 aña nos tin un poblacion mas saludable, segun Vroegop.

El a sigui bisa cu tur e partnernan den cuido ta bay sigui papia cu otro y ta bay mantene combersacionnan constante cu AZV y Gobierno pa percura pa cuido pa e poblacion keda hopi bon.