Un prestamo riba mercado local a kibra impase di negociacion den Reino na 2020 - *Gabinete Wever-Croes a ricibi un herencia basa riba un presupuesto 2017 di fantasia -*Tur pronostico economico y financiero di 2017 di Aruba tabata depende di Nicolas Maduro
ORANJESTAD (AAN) — Pa por analisa e trabou cu a wordo haci dor di Gabinete Evelyn Wever-Croes, mester bay na inicio di e temporada di gobernacion 2017-2021.
Ora bolbe na 2017, mester tuma nota di e situacion financiero cu ta bini dilanti den cifranan di rapportnan pero tambe den informacionnan di instancianan oficial cu ta papia di futuro.
Awe nos ta simplemente menciona algun rapport cu ta entrega nos cifranan pa haci nos trabou.
E ta sona manera un chiste, pero e no ta. Ora na 2018 DIARIO a cuminsa cu su coleccion di rapportnan pa trata na haya un bon bista di loke ta spera Aruba, nos a dicidi pa mira kico e ultimo pagina ta bisa prome cu nos cuminsa cu e parti mas dilanti.
E ta parce increibel, pero DIARIO ta invita tur hende pa bay lesa e pronosticonan financiero y economico di 2017 y 2018. Por mira claramente con tur instancia oficial tabata termina nan pronostico di futuro cu e ponencia cu tur desaroyo real ta depende di Nicolas Maduro.
Naturalmente nan tabata uza palabra diferente. Nan ta cuminsa bisa kico lo bay pasa, pero despues nan ta sigui bisa cu naturalmente tur cos ta depende si e proyecto refineria manera acorda cu Nicolas Maduro, ta sigui.
Si den historia di DIARIO tabata tin un momento dificil pa informa Aruba di su futuro, sigur tabata na final di 2017 ora Mike Eman “se fue” despues cu e mester a entrega su puesto di Prome Ministro sin cu el a alcansa loke for di 2015 ya instancianan manera IMF a bisa cu mester alcansa na 2018 si kier a evita desaster total pa Aruba.
Hulanda tambe tabata den un estado di desesperacion cu Gabinete Mike Eman, manera rapportnan tabata trece dilanti. E cifranan cu Mike Eman a prepara como despedida den e presupuesto pa 2017, a wordo rechasa door di Hulanda pero tabata tipico pa e gobernacion di Mike Eman.
Mike y Benny a tene e rapport “Bo Aruba” for di publicacion y bista di Aruba.
Casi por pensa cu Gobierno Mike Eman tabata sigui tene na Nicolas Maduro, pa Valero bay y nan haya e placa cu Valero lo a paga ora e bay, pa scapa nan mes di e momento cu nan ta bisa cu no tin placa mas. Cu Aruba a bati bancarota.
Ora analisa e cambio di gobernacion na 2017, ta mira pakico Hulanda mester a yama cielo danki pasobra Aruba a haya un gobierno nobo cu tabata dirigi e pais a base di realidad pero tambe un conocemento profesional enorme riba tereno financiero.
Gobierno Wever-Croes no a haya ni mucho tempo pa mira si mester chapi cura di e cas Aruba cu el a hereda. Imediatamente e mester a tuma medida y esaki a haci cu imediatamente gobernacion di Aruba a conoce accion responsabel.
Accion responsabel cu a continua ora porfin otro partidonan cu no tabata AVP, a haya e acuerdo cu cual Mike a mara Aruba na interes di Nicolas Maduro, cu tabata interes di Rusia tambe.
Ora Covid-19 a bati na porta, Raymond Knops a uza e situacion di 2017 cu Aruba tabata casi bancarota, pa trata di pusha Evelyn Wever-Croes contra muraya. Pero Prome Ministro Wever-Croes a pone su dobel seis riba mesa y a busca un prestamo mientras a sigui negocia cu Hulanda.
Na mes momento Ministro Xiomara Maduro a move y a introduci medidanan pa alivia peso fiscal, pa duna asistencia na empresanan pa economia keda bibo cu e circulacion necesario di placa den austeridad financiero.
Awe Aruba ta bay eleccion den un situacion, cu hasta prome cu Covid-19, nos tabata tin problema pa mira. Aruba tin un futuro su dilanti despues di un crisis yama Mike Eman y un crisis yama Covid-19, manera tur rapport oficial ta afirma.
