Prome restaurant den Caribe dirigi door di un Chef distingui cu un Michelin Star y tambe Green Michelin Star

E lo habri aki algun siman na Aruba

ORANJESTAD (AAN): Excelencia gastronomico ta topa cu elegancia ambiental e zomer aki, mientras Bucuti & Tara Beach Resort ta prepara pa habri ‘Terra by Jeremy Ford’. Esaki ta un restaurant inovador cu lo wordo dirigi pa Chef Jeremy Ford, di e restaurant Stubborn Seed na Miami cu a ricibi un prestigioso Michelin Star y recientemente tambe a wordo distingui cu un Green Michelin Star pa sostenibilidad.

   E logro mas reciente aki ta nifica cu Ford ta trece na Aruba e calidad y e prestigio di un di e combinacionnan culinario mas respeta y raro na mundo, haciendo esaki un prome pa e isla y e region.

Den un combinacion dedica di excelencia hospitalario, funda firmemente riba sostenibilidad, Ford a scoge Bucuti & Tara Beach Resort, e hotel renombra internacional como Tripadvisor su No. 1 Best Hotel den Caribe, No. 5 Best Hotel den Mundo, y e prome y unico hotel den Caribe cu un certificacion carbon-neutral, pa e experiencia culinario nobo aki. Hunto, nan ta refina loke ta nifica pa come bon, cu proposito y placer.

   “Mientras nos ta anticipa cu gran entusiasmo e presentacion historico di Terra by Jeremy Ford, nos ta extende nos felicitacion di curason na Chef Ford y su ekipo cu e premiacion di e prestigioso Michelin Green Star, un di e honornan mas halto pa gastronomia sostenibel. Bucuti & Tara Beach Resort, conoci como e hotel mas sostenibel di mundo, ta orguyoso pa pronto duna bonbini na huespednan pa un experiencia culinario cu ta eleva nan bienestar y placer, mientras tambe honra nos compromiso profundo y comparti cu nos planeta,” asina a expresa Crescenzia Biemans, Chief Corporate Officer di Bucuti & Tara Beach Resort, Aruba.

   Un di e reconocemento mas prestigioso y unico: Ford, cu a gana Top Chef Season 13 di Bravo Television, ta e chef renombra tras di un coleccion di destinacionnan culinario popular, cual ta inclui su restaurantnan na Miami, Las Vegas y Florida Keys. E restaurant di Ford na Miami, distingui cu un Michelin Star y nominacion di James Beard Foundation, a subi na un nivel mas elite cu e otorgamento recien di Michelin Green Star, un honor cu ta reconoce na e nivel mas halto di sostenibilidad culinario.

Masha poco chef of establecimiento den mundo por bisa cu nan tin e dos reconocemento aki. E enfoke detaya di Ford riba sostenibilidad — for di compra responsable, maneho eficiente di desprecio, operacion sostenibel cu baho consumo di energia, y cooperacion cu comunidad — lo sigui defini e experiencia di  gastronomia di Terra by Jeremy Ford.

   Un experiencia gastronomico basa riba responsabilidad: Terra by Jeremy Ford lo ta un destino gastronomico pa tanto huespednan di resort como residente local, ofreciendo un experiencia cu ta traspasa e frontera di gastronomia tradicional di luho pa pone mesun enfoke riba sabor, origen y sostenibilidad. E menu lo resalta e rikesa di Aruba y di region cu plato temporal, tecnicanan sostenibel y ingredientenan local y di Ford’s Farm, e finca organico di e chef na Homestead, Florida. Esaki ta un iniciativa cu ta permiti Chef Ford cultiva berdura vibrante y yerbanan aromatico di calidad superior, pa asina crea un conexion directo entre origen y mesa cu cada plato.

   Loke ta haci Terra berdaderamente unico ta cu e ta wordo desaroya cu e isla, pa e isla. Esaki no ta un concepto importa, sino un vision culinario singular crea hunto cu chefnan local, agricultornan, piscadonan y artistanan. Chef Ford ta desaroya Terra den colaboracion cu Maurice y Karim Neme, pioneronan di hospitalidad Arubiano di tercera generacion, kende nan historia familiar a yuda e desaroyo di e identidad turistico di Aruba durante decada. Nan laso profundo cu e comunidad ta garantisa cu Terra lo bira un homenahe na cultura, ingredientenan y medioambiente di Aruba.

  Huespednan por spera un experiencia culinario sin igual, unda tecnicanan gastronomico eleva, surtido sostenibel y e bunitesa natural di e isla ta uni den harmonia perfecto. Terra by Jeremy Ford ta aspira pa converti su mes den un punto di referencia pa gastronomia di destino den Caribe, naci for di un herencia comparti di excelencia y sostenibilidad, y realisa den e legendario Bucuti & Tara, e resort cu a duna un otro definicion na eco-luho mundialmente.