ORANJESTAD (AAN): Durante un sesion di pregunta cu lamentablemente no a bay door pa motibo cu Minister tabatin un kebrante di salud,
parlamentario y presidente di e comision di turismo, Jennifer Arends-Reyes tabatin un serie di pregunta importante den direccion di Minister di Transporte y Turismo, Wendrick Cicilia, tocante e recien firma Memorandum of Understanding (MOU) entre Aruba Airport Authority (AAA) y Royal Schiphol Group (RSG).
Arends-Reyes ta keda boga pa transparencia y responsabilidad den e proceso di colaboracion cu un grupo internacional manera RSG. “Aruba mester sa kico por spera for di e MOU aki. E aeropuerto ta un pilar esencial pa nos economia y turismo, y nos mester wak kico ta e ganashi real pa e pueblo Arubano,” segun Arends-Reyes.
Den su preguntanan, e parlamentario a pidi un timeline cla di kico a pasa entre e dos entidadnan despues cu e acuerdo anterior a yega su fin. Ta desea di tende for di ki dia AAA ta operando oficialmente sin RSG y kico tabata e compromisonan cu e gobierno anterior. Tambe, Arends-Reyes a pidi pa minister duna claridad riba si e Conseho di Comisario y e team di maneho di AAA a forma parti di e combersacionnan pa garantisa continuidad y stabilidad.
Un punto critico tabata e nombracion di un CEO nobo pa AAA, specificamente den un periodo ora cu e MOU ainda no tabata na vigor. Arends-Reyes kier sa si e decision aki tabata di acuerdo cu Aruba su interes nacional y cua tabata e proceso pa yega na e persona cu a eligi.
Adicionalmente, e parlamentario a trece dilanti su preocupacion tocante preparacion y capacidad local. “Ki tipo di entrenamento RSG a ofrece na e team di liderazgo di AAA e ultimo shete aña? E Arubiano ta haya un oportunidad real pa asumi e rol di CEO den futuro?” E parlamentario a destaca cu inversion den talento local ta fundamental pa un desaroyo sostenibel.
Arends-Reyes tambe a pidi claridad riba e rol cu RSG lo tin den e vision ‘Gateway 2030’ y ki aporte concreto nan lo duna den termino di branding y atraccion di inversionista internacional. E kier sa si Aruba lo logra beneficio real y cu por midi for di e colaboracion nobo y kico ta e obhetivo strategico cu Aruba ta persigui den e cuadro di e acuerdo nobo.
“Nos mester wak si e costo di esaki ta proporcional cu e resultado cu Aruba por logra. Un MOU ta mas cu un firma – ta un compromiso cu mester sirbi e interes di pueblo,” segun Arends-Reyes.
Finalmente, e parlamentario a enfatisa cu tur paso mester tuma luga di manera habri, transparente, pa garantisa cu e aeropuerto di Aruba keda den man firme, lidera pa e miho interes di nos isla y su hendenan.
