Relato oficial di WEB Aruba NV ta indica
ORANJESTAD (AAN): E relato oficial a sali, y WEB ta indica cu fayo den dos motor RECIP ta loke a pone Aruba bay plat riba Diasabra 5 di Juli cu a pasa.
E boletin nobo emiti pa WEB ta indica cu banda di 12:15 pm, a surgi un fayo den planta na WEB Aruba NV, cu a conduci na un Black out, un interupcion di coriente pa e isla completo. Personal di WEB mesora a drenta accion pa isola e causa pa por recupera coriente mas pronto posibel. E proceso aki mester a bay hopi controla pa e planta no cay atrobe, mirando e situacion delicado.
Nan a logra tur esey y keda cla pa 6:00 pm, dunando 100% di coriente bek na NV Elmar.
E fayo mes: Segun investigacion preliminar e causa di e blackout ta fayo di dos motor RECIP cual a causa un desbalance grandi den e sistema di suministro. Consecuentemente e sistema di ‘load shedding’ cual ta desconecta areanan di demanda halto na e momento ey, no a funciona corectamente. Un investigacion mas profundo lo mester mustra kico a causa e fayo di e dos motornan.
Despues cu a descubri e fayo y cu a logra controla esaki, a cuminsa recupera suministro di coriente alrededor di 2:00 pm pa prome areanan. E secuencia den recuperacion di suministro di coriente pa e diferente areanan ta depende di stabilidad di e red di coriente y demanda di coriente na e momento ey. Tambe ta duna prioridad na suministro di coriente pa areanan di Aeropuerto, Hospital y ImSan pa motibo di nan importancia vital pa e isla.
Alrededor di 3:40 pm un motor RECIP a ‘trip’ di nobo, cual atrobe a conduci na interupcion limita di coriente den areanan cu na e momento tabatin coriente caba. Pa 6:00 pm, e ekipo di produccion di WEB a logra reestablece coriente completo na e substacionnan di NV Elmar rond Aruba.
E blackout a afecta e suministro di awa tambe pa algun bario. Ta asina cu tin algun area, caminda awa ta wordo suministra por medio di pompnan cu ta traha riba coriente. Consecuentemente e falta di coriente a conduci na un bahada di presion di awa den e areanan.
Di parti di gerencia y empleadonan di WEB Aruba, ta ofrece disculpa pa e inconveniencia causa pa e black out di 5 di juli, cual a logra recupera den un periodo di 5 ora y 45 minuut. Empleadonan di WEB su departamentonan di produccion di coriente y awa, pero tambe esnan di sectornan di mantencion, di asuntonan tecnico, di distribucion di awa y departamento di comunicacion, tur a haci nan maximo esfuerso pa a limita e tempo di black out mas tanto posibel y pa mantene comunidad informa. Un biaha mas WEB su gradicimento pa e comprension y pasenshi.
