Prome Ministro na exitoso expo di Design Academy Aruba

Un atardi special na Museo MANA

ORANJESTAD (AAN): Prome Minister mr. Mike Eman a participa den e Opening Night di End-of-Year Exhibition 2026 di Design Academy Aruba, caminda mas cu 100 studiante a presenta e diferente obra y proyecto creativo cu nan a desaroya durante e ultimo aña escolar. E exhibicion, ta situa na Museo Arqueologico Nacional, a reuni studiante, mayor, docente, famia y invitado pa celebra creatividad, innovacion y artesania local.

   E exhibicion a inclui trabaonan di studiante di MBO Art & Design, e grupo di ceramica Clay Roots Future Makers, e participantenan di Scol Dun’un Man y studiante cu a participa den diferente curso y workshop organiza pa Design Academy Aruba. Durante su discurso, Prome Minister Eman a expresa su aprecio pa e labor cu Design Academy Aruba ta haci pa desaroya talento creativo na Aruba y a comparti un recuerdo di e colaboracion cu e instituto durante e preparacion pa Dia di Himno y Bandera.

   “E algun siman pasa, Design Academy Aruba a yuda cu un proyecto hopi special. Prome cu 18 di Maart, nan a acepta e reto pa restaura e monumento cu ta carga e nomber di 2.147 pionero cu a firma pa Aruba bira un pais autonomo. E nombernan no tabata claramente lesabel mas, y danki na e dedicacion di e docente y e studiantenan, nan a wordo pinta di nobo y a recupera nan briyo.”

   Prome Minister a invita esnan presente pa duna un aplauso na e docente y e studiantenan pa nan contribucion na e proyecto historico, indicando cu e iniciativa a mustra no solamente talento artistico, sino tambe compromiso cu patrimonio nacional. “E trabao aki a laga nos mira cuanto dedicacion e docente y e studiantenan ta pone den e academia. Awe nochi mi ta hopi curioso pa mira e resultado di tur e inversion cu e e studiantenan a haci den nan propio obra di arte.” Eman a felicita tur e participante y a expresa su deseo pa cu e anochi tabata un celebracion di talento, creatividad y desaroyo personal. “Mi ta desea tur e e studiantenan hopi exito, hopi exito tambe na tur e docente, y laga nos disfruta hunto di e talento hoben cu Aruba tin.”

   Na final di e ceremonia oficial, Design Academy Aruba a sorprende Prome Minister cu un regalo special, crea pa e mesun iniciativa di  e studiantenan, como señal di aprecio pa su presencia y apoyo na e academia. Cu e exhibicion aki, Design Academy Aruba a resalta e importancia di inversion den educacion creativo y e desaroyo di talento local. E evento a ofrece un plataforma pa hoben comparti nan trabao cu comunidad y mustra e potencial creativo cu Aruba tin pa ofrece.