Dos funcionario di Archivo Nacional tambe a participa na conferencia ACURIL

ORANJESTAD (AAN): Recientemente e empleadonan Natalia Rodriguez y Johny van Eerden di Archivo Nacional Aruba a participa na e conferencia ACURIL

cu a tuma luga na Puerto Rico di 6-12 di juni 2026. Aki nan a duna un workshop di 1 ora cu e titulo “From Collections to Connections: Finding Our Stories in the Archives”.

   Enfoke di nan presentacion ta pa mustra con por haci uzo di e plataforma digital Coleccion Aruba y otro fuente pa haci investigacion y conta historia di famia.

    Johny van Eerden a presenta hunto cu Asbjørn Hellum di Dinamarca y Andy Stauder di READ-COOP, e organizacion tras di Transkribus. E presentacion a enfoca riba con Inteligencia Artificial por yuda haci archivo colonial mas accesibel pa investigacion y comunidad.

   E trabao aki ta un culminacion di varios aña di colaboracion entre Archivo Nacional Aruba y su socionan internacional, cu como meta pa haci posibel busca y identifica nombernan di e personanan den archivonan colonial. Door di tecnologia moderno, historia di famia, migracion y conexionnan den Caribe ta bira mas accesibel pa tur hende.

   E presentacion tabata sumamente interesante y bon bishita door di e publico presente na ACURIL y nan a ricibi hopi reaccion positivo.

    Un danki ta bay specialmente pa Cultuurfonds Caribisch Gebied pa nan aporte financiero pa e realisacion di e  bishita aki na ACURIL.