Prome Ministro impresiona cu e proyecto cu Colegio EPI a presenta

Creatividad a resalta den studiantenan!

ORANJESTAD (AAN): Diaranson mainta, Prome Minister Evelyn Wever-Croes hunto cu Presidente di Parlamento Edgar Vrolijk, a bishita Colegio EPI en conexion cu e proyecto di innovacion cu EPI a entrega y gana cu ne, pa loke ta e competencia di Edutech.

   Prome Minister a indica di ta sumamente contento y orguyoso pa mira e creatividad cu nos studiantenan ta resalta na momento di bin cu un proyecto di innovacion pa nan scol.

   EPI a presenta un concepto diferente y hopi interesante. Compara cu otro scolnan, EPI su proyecto tabata mas enfoca riba e docentenan, cu e meta pa despues yega na e alumnonan a traves di e docentenan y prepara nan pa e habilidadnan di siglo 21. Mas di aplica pa solamente "hardware", e proyecto a enfoca riba con ta prepara e hendenan pa ta exitoso den futuro.

   Durante e bishita, Prome Minister y alumnonan a hunga un wega di quartet mientras a papia di e habilidadnan necesario pa tanto alumnonan como docententenan por ta exitoso den siglo 21.

   EduTech ta sigui den 2024: Gobierno a indica, cu pa loke ta e futuro di Edutech y mirando e interes di e scolnan pa ta parti di e proyecto aki, Gobierno a tuma e decision di sigui un aña mas cu ne. Tambe, ta pidi tur e scolnan pa cuminsa diseña nan proyecto di innovacion di trempan, ya cu e competencia lo ta uno fuerte.

   Prome Minister ta felicita EPI cu a logra gana cu nan proyecto presenta, y ta gradici Futura pa contribui na esaki.