Diamars anochi hopi hende a mire
ORANJESTAD (AAN): Diamars anochi alrededor di 8’or, varios hende a mira un obheto cu relativamente no tabata move mes rapido cu un ‘strea cu ta cay’, pero tabata manera laga partinan di obhetonan cu ta kima laga atras den su ‘rabo largo’ cu hopi a mira como blanco y hasta berde.
Loke a socede, ta cu un luna y pico pasa, esta dia 28 di Juli 2023, un raket Falcon-9 a wordo lanza for di Cape Canaveral Space Force Station na Florida. Abordo e tabatin un cargamento di 22 satellite chikito cu ta pertenece na e compania Space-X, y nan ta forma parti di e network di ‘Starlink’ cu ya ta suministrando consumidornan di varios region di mundo cu High-Speed Internet via satelite.
Sinembargo algo no a bay bon net durante e luna ey cu a lanza e satelitenan aki. Pasobra nan no a logra yega e orbita cu nan a wordo planea pa bay join e demasnan cu tin caba den espacio rond di planeta mundo.
E satelitenan den e mision ‘Starlink 30167’ a keda perde haltura, y poco-poco nan a cuminza drenta bek den atmosfera di mundo, y asina kima manera cu el a wordo observa Diamars anochi.
Esaki ta e di dos cu a wordo observa den e area, pasobra siman pasa Diaranson tambe un otro di e satelitenan chikito aki cu a perde haltura, a kima tambe den atmosfera riba Lama Caribe.
E potret aki, pa cortesia di Sociedad de Astronomia del Caribe (SAC) cu sede na Puerto Rico, a wordo tuma di un video net ora cu siman pasa un otro satelite di Starlink tabata kimando ora el a drenta bek den atmosfera.
Ki ora bo ta haya sa cu ta un satelite bo ta mirando den cielo, y no un strea cu ta cay? Hecho ta cu un strea cu ta cay ta drenta cu asina hopi mas velocidad, cu ta djis algun seconde e ta aparece den cielo di un punta pa otro. Pero un satelite ta relativamente mas poco-poco y tin biaha ta dura entre 1 y 2 minuut visible. Bo por hasta haya tempo pa saca un smartphone y saca potret of video. Pero un strea cu ta cay, pa ora bo gara bo smartphone, ya el a desaparece.
