Actualmente tin 81 centro di cuido di mucha registra
ORANJESTAD (AAN): Departamento di Mucha y Hoben (DMH) a finalisa un fase sumamente importante, esta percura p’e Ley di Centro di Cuido di Mucha drenta na vigor. Esaki ta nifica cu tur centro di cuido cu kier opera na Aruba, mester registra na DMH.
Pa aplica pa un permiso, por bay riba e website www.dmh.aw pa asina cuminsa e proceso legalmente. E meta ta, pa nos yuda y guia tur Centro pa yega na e exigencianan minimo rekeri, cu ta poni den e documento di Handleiding Kwaliteitseisen Kinderopvang Aruba.
REGISTRO NACIONAL
Actualmente tin 81 centro di cuido di mucha registra y nan lo ricibi un mail cu e documentonan basico cu nan falta pa entrega. E documentonan aki lo mester entrega mas pronto cu ta posibel. Den e mail cada centro lo ricibi di DMH, lo indica exactamente kico e centro falta y te ki tempo nan tin pa entrega algun di e documentonan. Corda cu e situacion ta keda diferente pa cada centro!!!
Den e sistema di aplicacion digital, lo tin diferente rekisito di e.o. documento y informacion cu mester upload. Importante pa remarca ta, cu tur e 81 centronan cu a registra prome cu 31 di maart 2023, ta drenta den e fase di transicion sin niun problema. P’e otro centronan cu DMH sa cu nan ta opera, pero no a registra prome cu 31 di maart 2023, nan a haya un mail caba, informando nan pa reacciona mas pronto cu ta posibel.
NIFICACiON PA E MAYORNAN
Basa riba articulo 8 di e ley, e presencia di un registro di tur centro tin como meta pa duna e mayornan un bista di e suministro di e centro pa mucha. Pues e mayornan tambe tin acceso liber na e Registro Nacional riba website di DMH.
Meta ta pa e Registro Nacional aki duna e mayornan cierto siguridad cu e cuido di mucha den e centro di cuido di mucha, cu lo haya un permiso pa opera, ta di suficiente calidad y cu oficialmente DMH lo percura cu e calidad lo keda na un nivel suficiente.
CON PA APLICA?
Riba e website di DMH (www.dmh.aw) por haya tur informacion pa loke ta trata Centro di Cuido di Mucha en general y tambe por aplica digitalmente pa e permiso temporario aki. Si click riba e website riba e tab “Aplica awor”, e website mes lo dirigi bo na e aplicacion digital.
Tene na cuenta cu pa cada documento, esaki mester ta apart den un solo file di e persona en cuestion. Por ehempel, si na bo centro, boso ta 2 trahador, bo ta traha un file di cada trahador y den e file ey di cada trahador, bo ta pone e documentonan rekeri separa. Tambe tin un poster cu tur e documentonan cu ta rekeri riba e website, cu mester ta upload den PDF of JPEG.
