Prome Ministro a considera su bishita na Nacionnan Uni como fructifero y importante

ORANJESTAD (AAN): Den corto bisa, ‘e reunionnan na e Asamblea general ta importante pa pone Aruba back riba mapa internacional y pa nos recuperacion di e pandemia’.

   Siman pasa na New York a tuma luga e Asamblea General di Nacionnan Uni 2021. Tur aña esaki ta worde organiza y aña pasa e tabata completamente virtual pa motibo di Covid-19. E aña aki e Asamblea General a tuma luga un parti den persona y un parti virtual. Prome Minister a participa den seccionnan virtual y tambe personal na New York como parti di delegacion di Reino.

   Nacionnan Uni ta un partner grandi pa Aruba. Especialmente como un pais chikito pa nos por logra e desaroyonan positivo y sostenibel cu nos ta busca pa nos pais.  Awo cu Aruba ta saliendo di e pandemia y cu nos tin e periodo di recuperacion nos dilanti, Nacionnan Uni ta bira un partner aun mas importante pa nos.

   Siman pasa Prome Minister a participa caba den algun di e encuentronan virtual y diabierna e tabata presente den algun reunion na New York. E siman aki tin algun reunion virtual cu ta continua. Como parti di delegacion di reino Prome Minister tabata presente pa asina logra pone Aruba atrobe riba mapa internacional cu ta hopi importante pa loke ta e recuperacion.

   “Esaki nos ta enfoca mas tambe pa asina trece mas inversion cu ta crea cupo di empleo cu ta loke nos mester pa por sali di e pandemia aki y su efectonan”, Prome Minister a remarca.

   En total, Prome Minister tabata tin 9 reunion importante y fructifero na e Asamblea General di Nacionnan Uni na New York.

  “Mi ta wak back riba e 9 reunionnan cu tabata tin durante 1 dia di mainta te anochi y mi ta kere cu importante ta pa keda mantene Aruba riba e mapa internacional pasobra ta asina so nos por haya ayudo y ayudo importante cu por yuda nos sali di e pandemia mas lihe”, Prome Minister Evelyn Wever-Croes a enfatisa.