Pueblo di Chile a cuminza fada di e Venezolanonan

SANTIAGO: Habitantenan di e parti nort di Chile, na e waf di Iquique, a fada cu Venezolanonan a invadi nan Plaza central y riba Diasabra a marcha contra esaki.

   Como 5.000 hende a participa den e marcha pa protesta e presencia di Venezolanonan ilegal, y dado momento algun demostrante a hasta cuminza bringa cu e emigrantenan eynan, y a cuminza kima tur material cu nan tabata usa como un area di campamento riba e Plaza.

   E demostrantenan tabata marcha y grita “No mas emigracion ilegal”, y tabata canta himno local como tambe e himno di Chile, y advirtiendo cu “Chile ta un republica cu lo wordo respeta”.

   Polis a haya nan ta drenta den accion pa stop varios pelea di e Chilenonan mes cu a cuminza pleita cu e Venezolanonan cu ta biba riba caya.  E demostrantenan a marcha di e ciudad bieu di Iquique como 10 bloque pa Oceano Pacifico unda Hotel y Apartamentonan ta operando a lo largo di e costa.

   E demostracion aki a tuma lugar un dia despues cu Polis a evacua un campo di emigrante cu a existi pa mas di un aña riba e plaza di ciudad.  Mayoria di e emigrantenan ta pober y sin documento, ta stagna na e ciudad aki, hayando trabao paki paya, pero no tin forma pa yega e capital.  Nan a core bay busca refugio awor banda di beach.

   Habitantenan a bisa cu na comienzo nan ta OK cu e Venezolanonan, pero awor e grupo aki a bin ta comete crimen y mucho mas, y esey si a pone cu awor nan pasenshi a caba.   Venezolanonan ta yega Chile, y awor ta haciendo nan mesun malcostumber di comete crimen.

   Algun hende a dicidi na kima algun tent, matras, saco, clechi y co’i hunga di e Venezolanonan, y nan kier pa djis Venezolanonan bandona e ciudad.

   Mientras tanto Nacionnan Uni a califica e demostracion aki un ‘humiliacion inadmisible’.  Nan ta haya esaki algo inaceptable contra migrantenan vulnerable, y a mustra cu e pensameno xenofobico di uni migracion cu delincuencia, cu pa malasuerte a bira hopi mas frequente na Chile, ta alimenta e tipo di barbarismo aki.

   Nacionnan Uni ta pidi pa respeta e integridad y dignidad di tur hende, principalmente ta pidi pa respeta y cuida e derechonan humano di mucha homber, mucha muher, y teenagernan.