ORANJESTAD (AAN): Ta un secreto publico cu tin retonan grandi den Enseñanza y pesey minister di Enseñanza Endy Croes a bisa cu e ta scuchando y ta bay sigui scucha mas stakeholder,
cu e ta bay analiza e dolornan y e ta bay saca tur e puntonan di prioridad den e veld aki, creando tambe e brug entre stakeholders.
Su intencion ta pa trece e trankilidad y pas cu tanto nos tur ta anhela.
Esaki e mandatario a bisa durante su prome conferencia di prensa como minister Dialuna.
“Mi sa cu no ta un tarea facil, pero tampoco e ta un tarea imposibel”.
Mi ta kere cu si tin e boluntad di tur partido y nos tur kier e mesun meta, nos lo por logra esaki pa e causa comun.
Pa cu e direccion aki nos a tuma e SDG 4 como nos compas.
Esaki segun Croes kende a splica cu SDG ta Sustainable Development Goals y number 4 ta para pa Enseñanza di calidad.
El a splica cu Diabierna ultimo en conexion cu e di 6 aniversario di SDG pa cu e 17 metanan mundial, e comision di SDG di Aruba a lanza un campaña di concientizacion na Imax Theatre y cu e ta felicita nan pa esaki.
“Obhetivo di e SDG 4 pa cu Enseñanza ta pa logra un Enseñanza inclusivo, di calidad y pa tur hende”.
Esey ta e tres puntonan di salida y mi kier pa nos corda esaki como e compas di awor bay dilanti”, segun e mandatario.
El a sigui bisa cu Enseñanza basicamente ta un di e motornan mas poderoso cu ta prueba, cu ta garantiza desaroyo y sostenibilidad.
Croes a bisa tambe cu den esaki e ta sinti cu tur stakeholder y tambe pueblo ta haya otro den e mesun linea aki.
“Aworaki ta keda e reto pa trece tur na mesa, pa wak den e mesun direccion cu trankilidad y pas, pa nos por yega concretizacion pa cu nos metanan”, segun e minister.
