Prome Minister  ta gradici Cuerpo di Bombero pa e trabou cu nan ta eherciendo pa e siguridad di Aruba

Riba Dia di Bombero:

ORANJESTAD (AAN):  En conexion Dia di Bombero, Prome Minister Evelyn Wever-Croes, den nomber di Gobierno di Aruba, ta gradici tur ciudadano di nos pais cu ta bisti uniform di curashi y balentia, nos bomberonan. Riba dia di Bombero, 9 di October, como un pueblo uni, nos ta honra nos ciudadanonan aki y ta gradici nan profundamente pa e trabou cu nan ta eherce pa brinda e siguridad na momento cu ta necesario.

            Dilanti vlamnan di candela y retonan den comunidad, nos bomberonan ta mustra e spirito berdadero di ta heroenan. Nan ta bay dilanti peliger na momento cu otronan lo mester huy poniendo nan bida na peliger pa asina proteha nos cas, nos comunidad. Nan compromiso cu nos pueblo ta bay mas leu cu paga candela. Nan ta esnan cu ta wordo yama den tur situacion insigur. Y pa e motibo aki, nan no solamente merece nos aprecio, sino tambe nos respet. Prome Minister, den nomber di Gobierno di Aruba y pueblo di Aruba, ta gradici Cuerpo di Bombero di Aruba pa e trabou cu nan ta eherciendo pa e siguridad di nos tur.

            “Ban laga e trabou di bombero, nan actonan den nos comunidad, inspira cada un di nos pa ta miho ciudadanonan, pa tin mas curashi y pa brinda yudansa na nos bisiñanan den momentonan di necesidad. Nos ta balora e trabou cu bomberonan ta eherce. Nos ta aprecia e trabou cu nan ta haci pa nos. Un dia manera awe ta pa aumenta conscientisacion pa e comunidad yega mas cerca di nos Cuerpo di Bombero y gradici nan”, Prome Minister a expresa.