Prome Minister ta encurasha cada hoben pa sigui nan soño cu determinacion

Riba dia Internacional di Hubentud,

 *Pa nan logra cosnan grandi  

ORANJESTAD (AAN):  Awe Diasabra 12 di augustus ta Dia Internacional di Hubentud. Prome Minister Evelyn Wever-Croes den nomber di Gobierno di Aruba ta uni su mes na e dia importante aki cu a wordo proponi pa Nacionnan Uni desde aña 2000.

            Meta di e dia aki ta pa trece conscientisacion rond mundo pa atende cu asuntonan di hobennan y reconoce e poder di hubentud den diferente area den cada parti di mundo.

            Na Aruba, hobennan a demostra potencial, esfuerso y talento riba diferente tereno y a logra cosnan grandi den comunidad como tambe a sa di pone nomber di Aruba na halto internacionalmente.  

            Como Arubiano, nos mester ta orguyoso di cada logro, grandi of chikito di nos hobennan y sigura nan cu nan ta importante pa e recuperacion y bienestar di nos pais. E soño di cada hoben, ta un paso mas pa un futuro di cada ciudadano. Un logro di e soño di cada hoben, ta defini con mas fuerte nos pais lo bira.

            “No laga niun hende pone bo pensa cu pasobra bo ta hoben, bo no por logra algo. Como e prome Minister President femenino na Aruba, nunca mi a pensa ora mi tabata hoben cu mi lo a yega na unda cu mi ta awe. Ohala cu mi por inspira cada hoben aki na Aruba cu kico cu bo hinca den bo cabes y bo ta determina y traha p’e, bo ta logr’e”, Prome Minister a remarca.

            Prome Minister ta encurasha cada hoben di nos pais pa “aspira, soña y pensa riba kico bo kier bira. Imagina bo den e rol ey y prepara bo mes den locual bo curason ta bati p’e y hunto cu determinacion bo ta logra. Nos ta den aña di union y positivismo, y nos hobennan ta parti grandi den e crecemento di nos pais.

            Riba e Dia Internacional di Hubentud aki, laga nos cada un felicita nos hobennan y recorda nan di e bon cosnan cu nan ta haciendo pa asina contribui no solamente na nan mes, nan hogar, pero sigur na nos pais. Danki na cada hoben pa ta parti di engrandecimento di nos pais”, Prome Minister a expresa.