Bold Properties Aruba a bira partner cu e prestigioso Christie’s International Real Estate

ORANJESTAD (AAN): Diabierna mainta Bold Properties Aruba a convoca un conferencia di prensa, unda cu broker Aileen Kelly a splica cu hopi animo, con e compania di Real Estate ta bay drenta den un aventura nobo.

   “Bold ta un compania hopi hoben cu a sa di crece den corto tempo y awe nos ta introduci nos logo nobo,” Kelly a indica cu sonrisa riba su cara.  “Mi kier a gradici nos team cu semper ta traha duro.”

   Na e ocasion aki, Jenniffer Figaroa tambe a hiba palabra y el a splica cu Bold ta hopi contento cu e direccion nobo den cual e compania ta bay.

   “Ora cu nos a ricibi e yamada for di e prestigioso compania di real estate cu ta Christie’s International Real Estate, nos a sinti nos mes hopi orguyoso pasobra nos a wordo acerca pa motibo di ken nos ta y kico nos ta haciendo, segun Figaroa.

   El a splica cu despues di hopi preparacion a yega na e logro aki pa traha hunto cu Christie’s International Real Estate.

  “Bold ta kere den innovacion y creacion di balor y pesey nos a bira partner cu e cas di subasta y compania luhoso di real estate na mundo”.

Nan tin un presencia den mas cu 50 pais y esey ta duna nos e confianza cu e cooperacion aki lo yuda nos sirbi nos clientenan cu excelencia, segun Figaroa.

Presidente di Christie’s Real Estate International Caribbean, Danielle Austin, tambe a hiba palabra.

Austin a splica cu ta hopi contento di a topa cu e team di Bold na Aruba.

El a splica cu e motibo pakico Christie’s a dicidi di colabora cu Bold ta e innovacion y mercadeo di Bold y nan experticio den real estate.

“Nan tin tambe e deseo pa crece y yuda nan comunidad, mientras cu e compania ta traha cu integridad y excelencia  y tur e cosnan aki ta importante pa nos, segun Austin.

El a splica cu na Christie’s frecuentemente ta wordo bisa cu luho ta mas cu un punto di prijs, esta e ta e nivel di servicio.

Segun Austin, esey ta algo cu Bold tambe ta refleha.