Awe ta Dia Internacional di Hoben y ATHA a cuminza celebre for di principio di siman

Franchesca Heinze, Director ATHA:

*A organiza diferente experiencia interesante 

ORANJESTAD (AAN) – Awe, Diasabra 12 di Augustus, ta Dia Internacional di Hubentud, y Asociacion Trabao pa Hubentud Aruba (ATHA) ta celebrando e dia aki desde Dialuna y henter e siman, cuminzando cu un bishita hunto cu 17 hoben, na LVV (Santa Rosa).

            Franchesca Heinze, director di ATHA a duna di conoce cu e bishita aki ta pa inspira e hobennan, con nan por desaroya hoby, pa posiblemente “un business” y asina nan por yega na cen.

“Despues di esaki, nos a bay riba rif unda nan a siña con pa pisca, cu ta otro moda na lama, pa asina nan por yega, posiblemente, na placa. Mas atardi, nos a bay cu e hobennan na strip di e hotelnan unda tabata tin un 'sunset bike tour'.

            E siguiente dia e hobennan a cuminza pa traha 'cupcake' y 'snacks', pa asina e otro dia no yega man bashi na organizacionnan. Despues di esaki nos a incorpora algo di cultura di Aruba, cu ta leuk pa e hobennan. Nan a siña con pa traha fli, nan a hisa nan fli y a competi cu otro”, Franchesca a duna di conoce.

            El a agrega cu despues di esaki nan a cera e anochi cu un fiesta den pool, y diabierna e hobennan a bay costa unda nan a bay haya inspiracion y enseñanza, con nan por proteha costanan di Aruba sigui pa e proceso con pa traha un cantica. Introduccion di esey a wordo duna pa Ivan Quandus. Na final di dia nan a bay hunga bolas criollas, Franchesca a relata.

            Heinze a menciona cu e hobennan tabata entusiasma y nan tabata tin ATHA trahando duro, pa por a realiza esaki ainda na Augustus, pues nan entusiasmo, nan input, tur a yuda ATHA pa por a realiza e actividadnan aki.

            E mensahe cu ATHA kier duna relacion a cu e Dia Internacional di Hoben, ta pa mayor, educador, guia, sea conciente cu mucha y hoben ta imita adulto, pues sea e “role model”. “Hobennan ta pasa door di un etapa di cambio, nan no ta mucha mas, pero nan no ta e adulto directo tampoco. Hormone ta desaroya y nan mes tin nan peaks, nan downs…dus como un adulto nos por guia nan, nos por indica nan cual ta e miho manera pa nan bay on cu nan desaroyo. No lubida, nan ta e lider di Aruba”! Franchesca Heinze, director di ATHA a remarca