Prome Minister  orguyoso con Elmar y DOW a logra finaliza proyecto di luz nobo den Bernhardstraat

ORANJESTAD (AAN):  Manera ta conoci, un di e visionnan di Gabinete Wever-Croes II, ta pa traha na bienestar y progreso di San Nicolas y Aruba en general.

Pa cu esaki, Gobierno a acerca DOW y NV Elmar pa busca un solucion pa cu e luznan den caya di Bernhardstraat. Aki ta unda e dos companianan estatal a uni y yega na un acuerdo pa asina cambia e luznan existente pa e tipo di luznan di Elmar. E proyecto aki a worde maneha pa e departamento di DOW mientras cu Elmar a brinda asistencia tecnico.

   Despues di varios luna di trabao, awe San Nicolas y henter comunidad di Aruba por goza di e cayanan ilumina. Prome Minister Evelyn Wever-Croes ta sumamente satisfecho di mira cu e proyecto aki a worde finalisa exitosamente. Esaki ta prueba cu ora bo ta traha cu amor pa bo pais, y den union cu otro, cosnan grandi ta worde realisa. Awe, comunidad di San Nicolas por ta orguyoso di mira Bernhardstraat ilumina, brindando asina seguridad na e peatonnan y automobilistanan.

   Prome Minister ta gradici, DOW y ELMAR pa nan esfuerso conhunto den logra finalisa e proyecto aki, y e comunidad di San Nicolas, y tur e stakeholdersnan pa nan cooperacion durante e lunasnan di trabao. Tambe, Premier Wever-Croes ta enfatisa, y sigura e comunidad di San Nicolas cu nan bienestar y siguridad ta un prioridad pa gobierno, y cu e proyecto aki ta un den hopi mas cu tin pa bin. "Gobierno su compromiso cu San Nicolas ta un hecho, y hunto, den union y positivismo, nos lo logra cosnan grandi pa San Nicolas y Aruba en general" Prome Minister a expresa.