Na Playa tambe tin negoshinan ta laga vet y azeta bay den riolering

ORANJESTAD (AAN): Algo cu a papia hopi di dje ultimo lunanan, ta e hecho cu keto bay tin algun operador di restaurant, snackbar,

of bar cu no sa mes di e prohibicion di benta azeta of cualkier tipo di grease den riolering.  Pues no laga azeta basha bay den tubo den labaplato, ni toilet, y tampoco di labamano.

   Pero a bin nota con specialmente den area di Palm Beach, tin sea Hotel, Restaurant, of Bar cu ta keda laga azeta sushi bay den tubo y riolering.  E tiramento di vet di cushina riolering ta trece e consecuencia cu e sistema ta stagna, plok, y esaki ta pone cu parti di Irausquin Boulevard ta basha over cu awasushi ta hole stinki den e area.  E ta provoca mesun problema tambe cu e proceso bacterial na e planta di procesa awa sushi na Bubali, cu ta yena e area cu mal holor.

   Pero no ta na area di Palm Beach so tin e problema.  Fotografo di DIARIO canando den Oranjestad, a bin sinti holor desagradable ta sali for di e riolering den algun caya.  Aunke e no ta sali bon riba e potret, pero hecho ta cu bao di e trali tin visiblemente vet ta acumulando.

   Aki por mira 2 di e riolering cu ta geplug cu vet, anto den pleno Oranjestad. Algo cu ta masha facil pa haya sa, ta cua restaurant lo por a tira vet den e rioolnan aki, ya cu nan tur dos riolering ta cerca di 2 establecimento cu ta bende cuminda.

   Corda bon, cu no ta menciona 2 riool so, paso tin hopi mas den pleno Oranjestad, cu tambe ta worde maluza, cu e mesun situacion aki, di establecimento, cu ta djis tira nan vet di cushinan eyden, sin tene na cuenta, cu ta cay un palo di awacero y e rioolnan aki, no por funciona pa yuda desvia awa di eynan.